Page 79 - MIN ARENDS

Kawish Misier: ‘Aruba tin hopi hende creativo y innovativo’

Tuesday, 16 May 2017 21:21
Comparti

Misier ta un di e empresarionan hoben cu a acepta e invitacion ofreci dor di “Hackathon Oranjestad” pa trece
ideanan dilanti cu por stimula e actividad economico y atractivo di Caya Grandi y Centro di Ciudad.
Na final di e evento, e no a resulta den e ekipo ganado, pero tabata masha satisfecho cu e experiencia y e
potencial di e ideanan cu keda presenta. ‘Nos tin cu cuminsa traha cu otro y comunica cu otro; bin cu “collective
branding”, “collective marketing” pa asina pueblo ta sinti cu e cambio ta pa nan mes,’ Misier a bisa.

Hackathon Oranjestad a tuma luga den fin di siman ultimo den espacionan ehecutivo di ‘The Vault’ na Playa mes.
Aki cinco ekipo a sinta dos dia largo pa desaroya un idea den un proyecto. E ganado a resulta e ekipo ‘Monumnt’
cu a presenta un aplicacion di ‘realidad aumenta’ (Augmented Reality) cu ta laga edificio y monumentonan conta
nan storia, pero tambe ta permiti tiendanan ofrece promocionnan.

Na opinion di Misier, kende ta tambe un miembro di directiva di Camara di Comercio, Hackathon Oranjestad ta un
evento hopi creativo y bon pa tin na Aruba paso “nos tin cu scucha nos mesun hendenan, nos pueblo, nos mesun
empresarionan. Tin hopi hende ta papia tocante caya grandi, kico a bay bon y kico a bay malo y kico nos tin cu
haci, pero no tin hopi hende cu ta echt haci loke nan ta bisa.”

E empresario hoben ta kere cu despues di e discusionnan di ultimo tempo, e actividad di Hackathon ta yuda
stimula Caya Grandi y centro di Oranjestad pa bay atras y caya no muri. E ideanan creativo tur ta posibel na Aruba
mes, y si nan bay bon, nan por representa un solucion pa otro islanan den Caribe.

Su conclusion ta cu Aruba tin hopi hende creativo y hopi hende innovativo y e manera con a bin hunto pa traha
den grupo, bo ta wak e “magic start to happen”. ‘Tanten cu nos keda separa y no bin hunto, nos no ta comparti
nos creatividad,” Misier a bisa. ‘Tabatin ideanan hopi bon y mi ta spera cu e hendenan cu ta encarga cu
Mainstreet ta scucha nos y wak kico nos tin di bisa.

Hackathon Oranjesta ta un iniciativa di Ministerio di Asuntonan Economico hunto cu Bureau Innovatie, KvK y VNO
cu a join pa facilita y ehecuta e evento. Minister mr. Arends a duna di conoce cu e siguiente paso lo ta pa registra
y implementa e idea ganador, pero cu tur cinco idea tin atencion di Gabinete Mike Eman II.