Page 36 - FDLP
P. 36
ORANJESTAD (AAN)- For di Aruba Softball Bond, nos a haya e siguiente comunicado
caminda nan ta recorda y bisa ayo na un baluarte di deporte, Sr. Hyacintho Chin Thiel.
“Cu hopi duele y dolor na nos curason Aruba Softball Bond lo mester bisa ayo te
despues na un ser hopi keri kende semper a traha pa softball boluntariamente sin
importa nada a cambio. Chin Thiel recientemente riba su fecha natal 17 di Augustus
ultimo cumpliendo su di 70 aniversario a wordo homenagea y reconoci pa Aruba
Softball Bond cu e campeonato oficial 2018 dedica na su honor.
Chin sinembargo tabata den hospital pero nunca por a biba pensa cu algun dia despues
Chin lo bay laga nos. Tanto Endy Croes Presidente di Aruba Softball Bond y Chipen
Chirino vice presidente di ASB a bishita Chin Thiel un dia promer cu el a fayece. Chin un
cuidadano di Warawara hopi keri kende desde hoben a practica deporte y despues a
bira dirigente.
Desde 1979 Hyacintho Chin Thiel a drenta bestuur di Aruba Softball Bond y a traha
incansablemente te cu awor. Chin un homber humilde di Sta Cruz cu un caracter noble
semper cla pa yuda. Recordando Chin Thiel durante diferente reunion semper e ta
skerpi y ta para pa locual e ta kere aden. Chin a representa Aruba como miembro di
Directiva y hefe di delegacion pa hopi aña largo na diferente pais rond mundo.
Un di e ultimo potretnan cu nos a logra compila ta Chin hunto cu Seleccion masculino
na Bogota Colombia na aña 2015 unda Seleccion a logra un medaya di brons den
campeonato di CONSURSA.
Nos por recorda e alegria cu a brota for di curazon di Chin Thiel momento cu Aruba a
derota Panama pa conquista dicho medaya. Ta momentonan inolvidable y nunca nos a
biba pensa cu esey lo tabata Chin Thiel su ultimo biahe cu un seleccion di Aruba como
dirigente hunto cu su amigo di añas Chipen Chirino y Endy Croes.
Directiva di Aruba Softball Bond Endy Croes, Francisco Chipen Chirino, Andresito
Krozendijk, Roy Geerman, Estefano Croes, Pierre Croes, Franklin Odor hunto cu tur
miembro di diferente Comisionnan y sigur tur nos clubnan miembro y nan atletanan ta
yama Chin ayo y sosega na Paz.
