Page 6 - ON
P. 6
Minister President tin
iniciativa pa scucha y
yuda studiantenan
Arubiano na Hulanda
Published on March 24, 2017 in Politica
ORANJESTAD, Aruba
Cirielle Hijmering ta un studiante di HBO-Rechten na Utrecht. E mescos cu hopi otro
Arubiano sigui estudio na Hulanda, a asisti na e encuentro cu Prome Minister Mike
Eman a sostene e siman aki pa intercambio di informacion y idea. Cirielle a comenta
riba su impresion: “E tabata sigur algo hopi atractivo. Mi a comparti opinion cu basta
studiante caba y hopi hende a hay’e un presentacion informativo. Prome Minister a
splica amplio di e bentahanan cu ta bin pa nos awo como studiante ora nos bay bek
Aruba. Mi a echt disfruta esaki y mi a ripara cu otro studiante tambe a saca fruto di e
presentacion.”
E hoben a menciona con Gobierno ta purbando di rebaha e interes di e prestamo pa
studiante, cual sigur ta algo cu tin hopi influencia riba e studiantenan pa bay bek nan
pais. “MinPres ta purba di atrae studiante pa bolbe y no keda na Hulanda despues di
nan estudio. Bo ta wak cu tin e iniciativa pa scucha e studiantenan y pa yuda
studiantenan y mi ta haya esaki, te awo, ta bayendo hopi bon. Ta beneficioso tambe pa
tende kico e studiantenan tin di bisa pa asina Gobierno sa tambe na unda nan tin cu
mehora y unda ta bayendo bon caba,” asina e studiante Arubiano a expresa.
Algo cu tambe ta dun’e satisfaccion ta e impresion cu tin awo na Hulanda di nos isla.
“Aunke tin parti di Hulanda caminda Aruba no ta conoci ainda, hopi otro caminda e ta
bon conoci. Si bo toca e topico di politica cu cierto hende na Hulanda, bo ta tende cu e
nomber di Prome Minister ta sali hopi na cla como cu MinPres ta comparti hopi cu
politiconan aki na Hulanda.”
Cirielle ta conta cu den e presentacion el a wak hopi cambio na Aruba, apenas den e
ocho luna cu e tin na Hulanda. Esaki ta pone pensa cu aki cuater aña lo ta un Aruba full
nobo. “Mi ta wak cu Aruba a bay hopi padilanti pa bira un Aruba di calidad,” e ta bisa.
Diaranson ultimo Minister Presidente Eman a haci espacio den su agenda di trabou, pa
topa cu e hobennan na ‘De Winkel van Sinkel’ na Utrecht.
