Page 32 - SJA

Corte: Aunke tata reconoce yiu e por sigui carga fam di su

mama

Tuesday, 28 February 2017 22:04
Comparti

Corte ta di acuerdo cu e ley di Aruba relaciona cu otorgamento di fam ta discriminatorio pa e mamanan y
como tal a dicta un sentencia siman pasa cu un tata ta reconoce su yiu homber di 15 aña, mester cri'e,
pero e yiu ta keda cu fam di su mama mes.
E sentencia aki ta pone mas presion riba Parlamento pa pasa e ley di introduccion di e cambionan den
nos Codigo Civil pa caba, sino ta den tur caso lo sigui considera e ley como discriminatorio pa hende
muhe.
Dia 21 di februari ultimo Corte den Prome Instancia di Aruba a dicta un sentencia cu nan a laga publica
dia 28 di februari 2017 relaciona cu un caso di "Personen en Familierecht". Abogado mr. A. Caster a
entama un caso civil den nomber di tata di un yiu, contra e mama di e mucha, cu a conta cu sosten legal
di abogado mr. Sven Faarup. Voogdijraad a participa den e caso como curator di e menor di edad y
tambe a participa e departamento di Burgerlijke Stand di Aruba.
E caso tin di haber cu un tata cu a dicidi di reconoce su yiu homber, cu awendia tin 15 aña di edad caba. E
mama a bisa di no tin nada contra pa e tata reconoce su yiu, pero e kier pa e yiu sigui carga su fam si. E
tata sinembargo no a keda contento cu e decision di e mama y a opta pa busca opinion di un Hues
imparcial pa saca nan for di e impasse familiar. Voogdijraad a opina di no tin ningun problema of risico
pa laga e tata reconoce e yiu, pues no ta teme pa consecuencia social psicologico pa e mucha. Di acuerdo
cu Burgerlijk Wetboek van Aruba (BWA), e fam di un mucha ta sea di su tata of di su mama. Di acuerdo
cu e ley di fam, un mucha ta haya fam di su tata asina cu e reconoce.
Pero, ta sinti cu e ley aki ta discriminatorio dependiendo e sexo di e ciudadano. Ta sinti cu e mama ta
keda atras banda di e tata den e ley, sin cu tin suficiente argumentonan legal den ley cu ta hustifica esaki.
E forma di discriminacion contra hende muhe ta prohibi den articulo 1.1 di nos Staatsregeling. Ta sinti cu
e ley ta contra nos constitucion y ta contradictorio na 3 diferente tratado internacional cu Aruba a firma,
esun Europeo (EVRM), esun internacional (IVBPR) y e tratado contra discriminacion di hende muhe.
Riba dje ta bin acerca cu dia 24 di mei 2016, Corte Comun di Caribe Hulandes a dicta un sentencia den
un caso similar, den cual a dicidi cu e mucha por keda trankil cu e fam di su mama, pues cu e ley cu ta
indica cu automaticamente ta haya fam di tata ora e reconoce e yiu, no ta aplicabel sin mas. Parce cu na
Aruba mes tambe tabatin un sentencia asina aki caba algun luna pasa.
Corte den Prome Instancia di Aruba a tene cuenta cu tur e locual tin ariba menciona, banda di e realidad
cu e mucha semper a biba na y cu su mama so desde cu el a nace, cu el a carga fam di su mama desde el a
nace y cu e por causa bruhamento dor di cambia fam awor cu e tin 15 aña caba, cu Hues a dicidi pa tambe
exclui aplicacion di e ley pa duna e yiu fam di su tata awor cu a reconoce.
E caso aki tin di haber solamente cu e asunto di fam, pues e otro factornan manera alimentacion,
obligacion di informa mayornan di e yiu, bishita, ken tin autoridad riba e mucha y otro asuntonan lo
mester regla den un otro caso.
Na final Hues mr. J. Sap a dicta un sentencia historico pa Corte di Aruba, den cual ta confirma e
reconocimento di e yiu dor di su tata, pero cu e ta laga e ley di fam for di discusion awor aki y como tal e