Page 9 - DESPA

Ta hopi importante pa notifica sintomanan di Zika

Publication: Wednesday, 22 March 2017. Categoria: General
Arnelda Els:

ORANJESTAD (AAN): Arnelda Els ta funcionario den e
seccion di Malesanan contagioso di Departamento di Salubridad Publico y tabata tey durante un presentacion cu a
wordo haci na e hoteleronan na Tierra del Sol awe mainta.
El a splica cu durante di e presentacion ta hopi importante pa e sintomatologia. El a presenta e sintomatologia di
Zika. Kico nan, como departamento di malesanan contagioso ta haci. Con nan ta deal cu cada notificacion cu e
dokternan ta manda pa nan.
Kico tin cu tene cuenta cune
En principio, segun Els, e notificacion ta drenta via dokter. E dokternan mester notifica e departamento si nan a topa
un persona caminda cu nan ta sospecha di un di e malesanan transmiti via un Vector, via sangura.
Naturalmente na momento cu e dokter mira e pashent na su oficina, e no por diagnostica mesora cua di e tres
malesanan aki ta, esta Zika, Dengue of Chikungunya.
Ta depende di e sintomanan cu e persona ta mustra ta hopi importante como pashent, como persona, cu ora cu bay
cerca e dokter di cas, y splica cu bo a bira malo, bo a haya e rash, keintura, splica e dokter cua ta e sintomanan mas
cu a haya.
Por ehempel a haya un wowitis cu ta guia e dokter mas, cu por ta un Zika. Si a haya por ehempel dolor di cabes
mas tanto, parti patras di e wowonan, e ta guia e dokter riba un dengue por ehempel. Si haya dolor den wesonan,
esey ta focus mas riba Chikungunya.
Ta hopi importante pa bisa e dokter kico ta e sintomanan cu ta haya y pa corda e dokter pa por fabor, notifica
departamento di Salud Publico. E cifranan ta hopi bunita, pero si no ta haya e notificacion, e cifranan no por ta
completamente corecto basa riba locual ta pasando bao di e poblacion.
Departamento di Salud ta traha a base di e notificacion cu ta haya di e partnernan medico.
Relacion entre dokter y DVG
Segun Els, e relacion entre dokter y salubridad publico a mehora un tiki. Tin cierto dokternan cu ta notifica. E
cantidad di notificacionnan a subi den e ultimo temponan. Pero toch e no ta optimal. Un notificacion for di e
dokternan, 100%, no por spera. Nos tur sa cu nos dokternan ta hopi druk.
Tin di nan ta keda te anochi laat ta atende nan pashent y pa bay sinta yena un papel pa manda su mañan Salubridad
Publico, ta tiki fastioso.
Pero e ta importante, pasobra a base di e notificacion aki, Salubridad Publico ta haya datonan corecto di kico ta
pasando bao di e poblacion y por traha beleidnan cu ta mas dirigi na e problematicanan di salud.
Esaki no ta solamente pa Zika, Chikungunya y Dengue, pero ta pa tur e otro malesanan cu mester wordo notifica,
segun Ley.