Page 52 - ARENDS JAN 12

Glenbert Croes: Gobierno di MEP lo revoca permiso di PDV
Mantenimiento na CITGO

Wednesday, 11 January 2017 18:57
Comparti

“Ayera mi a ricibi e informacion cu e filial di PDVSA, esta e compania PDV Mantenimiento a solicita na
aña 2015 pa establece na Aruba.

Ayera ta prome biaha cu mi ta wordo poni na altura di e hecho aki cual partido MEP ta condena
energicamente”, asina Glenbert Croes a duna di conoce durante e conferencia di prensa semanal di MEP.
Partido MEP den un forma categorico kier laga sa: PDV Mantenimiento no ta fit den e vision di
cooperacion entre Venezuela y Aruba riba e tereno di refineria cu mester ta un “ganar – ganar” pa ambos
pueblo. Te awor: PDVSA-CITGO ta opera e refineria y tin un compania so diki diki liga na un Minister di
AVP cu ta hayando tur e trabaonan di sub contratista den CITGO Aruba. “Esaki no ta aceptabel y nos
pueblo no ta guli e situacion aki mas pasobra ta tur contratista local mester haya un oportunidad husto.
Riba dje nos a compronde cu e compania di Portugal di scaffold ta wordo presiona pa traha cu e mesun
compania aki diki diki liga na un Minister di AVP, mientras cu tin 10 contratista local cu por haci e
trabao aki. Inaceptabel!”, tabata palabranan fuerte expresa pa e Parlamentario di e fraccion mas grandi
den oposicion.

Pa loke ta PDV Mantenimiento, semper for di tempo di Lago, Coastal, El Paso y Valero nan tabatin un
maintenance department pero ta contratistanan local a haci e trabao di mantenemento di e refineria y na
Aruba den transcurso di tempo tin varios compania local cu a bira sumamente capaz pa haci e trabao aki
di mantencion a “plena cabalidad”. E pregunta categorico cu ta haci ta: Con por ta cu Gabinete Mike
Eman II ta coopera y ta otorga e permisonan na PDV Mantenimiento mientras cu Gobierno di AVP sa cu
tin suficiente contratista cu suficiente capacidad pa haci e trabao aki? E contesta ta: AVP, Gabinete Mike
Eman II y e 4 Ministronan ta duna PDVSA-CITGO tur tur tur cos semper y cuando nan interesnan
personal wordo recompensa den e refineria. E interes personal di e 4 Ministronan di AVP pa nan ta mas
importante cu e interes di tur e trahadonan local wardando pa trabao, ta mas importante cu e interes di
tur e contratistanan local wardando pa trabao. Partido MEP no ta tolera e situacion aki pesey nos a
drenta fase di alerta previo pa bay den accion ora cero atrobe.