Page 48 - ARENDS JAN 12

Ex Minister Otmar Oduber exigiendo pago di 173 dia di
vakantie

Wednesday, 11 January 2017 23:25
Comparti

Despues di a tuma su retiro inmediato como Minister di Turismo, Transporte, Cultura y Sector Primario,
Otmar Oduber a manda un carta pa Gobierno exigiendo pa e cobra su "overbruggingstoelage"

cu ta balora na 90% pa luna di su salario di Minister durante 1 aña largo. Pero comosifuera poco, e ex-
mandatario awor ta exigi pa pag'e 173 dia di vakantie cu e no a tuma durante e 7 añanan como Minister,
balora na mas di 80 mil florin!

Ta bon pa aclaria cu Otmar Oduber, mescos cu tur otro di tur asignatura, tin derecho pa cobra 1 aña mas
di salario (parcial) despues cu bandona funcion. No por keda sin menciona cu tin mandatario cu den
pasado a opta pa no cobra e suma aki, mientras cu tin otronan cu a laga e placa aden pa drecha edificio
deteriora di Gobierno mes.
Pa loke ta e dianan di vakantie cu e no a tuma, segun e mandatario, el a manda un carta exigiendo e suma
aki como su derecho. Tambe e ta yama casi diariamente na DRH y na Bestuurskantoor pa puntra tur dia
ki dia ta pag'e pasobra e mester di e placa. Segun fuentenan den Conseho di Minister, a dicidi
recientemente cu lo n o honra e peticion di nan ex colega pa cobra e 173 dianan di vakantie. "E por soña
cune pero e no lo hay'e", asina un Minister a confia nos. Legalmente e no tin derecho riba dje.

E mesun fuente a sigura cu ta custumber den e ultimo 7 añanan cu den temporada di carnaval nan ta
perde Otmar Oduber casi dos luna largo pasobra carnaval ta bay prome. E ta full den Carnaval cu un
grupo di dje mes of yega na dje. E mes tabata papia pa e grupo. Un grupo cu tur hende conoce como e
grupo di carnaval di Otmar. Banda di su participacion y metemento activo den carnaval, tambe durante
aña mas cu un biaha e ta publica potretnan cu famia den exterior disfrutando di vakantie riba red social.
Esaki kitando tur e biahenan di trabou cu tambe por wordo combina cu vakantie di algun dia.
Otmar Oduber hunto cu Andin Bikker a funda partido POR recientemente y ta den pleno preparacion pa
participa den e siguiente eleccion na September 2017. E ta mustra masha fastioso pa un politico, despues
di baha boluntariamente como Minister awor ta exigi tanto placa asina y ta purba di tur forma pa por
recauda fondo via caha di Gobierno. Apenas algun luna pasa Andin Bikker tabatin basta critica riba e
forma di proceder di Otmar Oduber como Minister, specialmente durante tratamento di e ley di All
Inclusive unda el a catalog'e como un "spin doctor", cu e kier demasiado poder pe y cu e ta penalmente
responsabel dor di sconde documentonan crucial di Gobierno pa Parlamento. Cu e hecho nobo aki di kier
cobra salario y vakantie atrasa di 7 aña, no ta conoci e opinion di Bikker awor.