Page 42 - HOSPITAAL

Minister Arends: E hospital nobo ta brinda un area di
oportunidad pa turismo medico

Sunday, 23 April 2017 15:08
Comparti

Den un reciente publicacion di ministerio di Asuntonan Economico, Gabinete Mike Eman II a presenta e cinco
areanan di oportunidadnan economico. E areanan aki lo ser desaroya a base di cuatro sector: industrianan creativo,
logistica, tecnologianan limpi y actividadnan cu un balor agrega pa nos turismo.

E hospital nobo cu caracteristicanan ‘state of the art’conhunto cu e area rond di esaki ta cumpli cu e rekisitonan pa
hasi uzo di oportunidadnan cu tin un balor agrega pa e pilar principal di nos economia, manera turismo medico,
programanan educacional y programanan medico, como tambe aceleradornan pa amplia conocemento riba tereno
medico.
Avance y desaroyonan cientifico, sigur riba tereno medico, ta canando di tal extremo, cu e hospital existente no por a
cumpli mas cu loke mundo moderno y ciencia medico ta exigi di dje. Esaki ya pa algun aña caba. Un upgrading y
ampliacion tabata mas cu necesario. Plannan a wordo traha ya for di fin di siglo pasa pa amplia, reconstrui y
modernisa e hospital. Aunke e plannan tabatey y arkitectonan a traha riba diseñonan, nunca e proyecto a start. Sea
pa falta di vision, curashi of pa falta di financiamento of ki sea por tabata e motibo. Hecho ta cu ora e actual gobierno
a tuma rienda di pais Aruba, e hospital tabata den necesidad urgente pa haya su renobacion y ampliacion.

Como parti di e plan di inversion na inicio di Gabinete Mike Eman I pa duna un empuhe na nos economia, reduci
tasa di desempleo y fortifica Producto Aruba, a inicia cu e proyecto di reconstruccion, ampliacion y modernisacion di
dr. HoracioOduber Hospital.
Arends: “Por mira e proyecto entre gobierno y SOGA den caso di renobacion y expansion di hospital como un
cooperacion entre sector publico y sector priva. Mescos cu Green Corridor y Watty Vos Boulevard, nos hospital nobo
ta un di e ‘flagship projects’ di e plan di inversion anuncia na aña 2010. E proyecto aki no ta encera solamente e parti
fisicio di hospital, pero tambe otro cambionan riba diferente tereno cu ta necesario, manera un miho calidad di
cuido, un SpoedEisende Hulp miho ekipa, acomodacion di specialistanan y mucho mas. E proyecto ta uno hopi bon
pensa y hinca den otro y ora e prome partinan ta cla, cu ta pronto, Aruba tin un hospital moderno cu tur facilidad cu
e tin mester.

Ademas di e inyeccion di riba Afl 300 miyon den nos economia manera anticipa, Minister Arends ta mira den e
hospital nobo cu ta uno state of the art, sin duda tambe e posibilidad grandi pa start cu turismo medico cu lo
contirbui na e diversificacion di economia di Aruba.