Page 13 - KPA

Polis lo controla y multa esnan cu no a

paga number di auto

Posted on 05/17/2017 10:25 am AST | Updated on 05/17/2017 10:25 am AST

ORANJESTAD – Polis lo controla trafico y multa esnan cu no a paga nan number
di auto. Si tabatin cualkier duda di esey, minister di husticia Arthur Dowers
diaranzon a confirma esey publicamente. E mandatario a remarca cu e la tuma
nota, for di belastingdienst, esta servicio di impuesto di Aruba, cu tin 20% di
personanan cu ta doño di un vehiculo di motor, cu ainda no a haci pago di nan
belasting di nan vehiculo di motor cu nan tin den uso. Mirando cu nos polisnan ta
‘hopi activo cu nan controlnan riguroso den tur skina aki na Aruba’, e titular di
husticia a participa na tur hende, pero en especial e 20% cu ainda no a regla nan
impuesto di vehiculo di motor, ‘ pa nan tene bon cuenta cu esaki’. Esaki ta nifica cu
lo controla trafico y si haya personanan cu no a cumpli, lo actua apropiadamente.

UPDATE RIBA PAGO NUMBER DI AUTO

Manera NoticiaCla.com a raporta ayera caba, un total di 15.228 persona a ricibi carta di
Departamento di impuesto (DIMP) e siman aki pasobra nan no a paga nada di
motorrijtuig belasting. Esaki ta un 20% di e total di automobilistanan cu ta usa e
careteranan di Aruba. Asina vocero di DIMP Meverly Romano a informa prensa awe
mainta. Mientras cu nan ta contento cu 80% su cumplimento, e carta manda tin cu
‘motiva’ e ‘no pagadornan’ pa ainda paga. “Mayoria a cumpli y ta demostra nan sentido
di responsabilidad” Romano a bisa. Ademas a mustra cu e carta pa e miles di hende, no ta
reemplaza control di polis. “Boet di polis ta separa” Romano a sigui bisa.

CIFRANAN RIBA PAGONAN HACI Y NO HACI

For di e 80% di hende cu a paga, 53% a paga nan number di auto henter aña, 27% a paga
prome mitar di 2017. For di 15.228 persona, 13.487 ta cay bou di e plachi A, 634 ta
motociclista (di 2267), 516 ta V-car (di 4313) , y 227 ta di truck di diesel (di 1138). Tur
esnan aki a haya e carta di DIMP fecha dia 15 di mei, y cu a wordo avisa cu nan tin 2
siman pa paga esaki, y ta vence dia 29 di mei proximo. A encurasha pa paga ‘online’ pa
evita liña nan na DIMP.