Page 11 - ROBERT CANDELARIA

ORANJESTAD (AAN): E suplica di hopi hende
aparentemente a bin ta hayando oido di Gobierno. DIARIO a tuma nota cu Ministerio di

Husticia a saca un anuncio pa Destaho Publico, cu e meta pa busca un acuerdo di Lease
pa opera un Helicopter pa Polis na Aruba.

Gobierno ta busca forma pa lease un Helicopter, cu ta inclui e servicio di un piloto. E
proyecto tin como meta primordial pa duna servicio di Helicopter na Cuerpo Policial den
cuadro pa combati criminalidad, mantenimento di orden publico, y den trabao di
buskeda.

Ademas di yuda Cuerpo Policial, e destaho publico ta indica cu e Helicopter por wordo
usa tambe pa transporte di hendenan gravemente herida rumbo pa Hospital, y tambe
transporte for di lugarnan cu ta dificil pa yega na dje riba e isla, y tambe den search

and rescue.

E biaha aki, Polis ta rekeri un Helicopter cu por lanta vuelo cu un maximum takeoff
weight di 2.500 lbs., lugar pa minimo 3 hende sinta, cu por opera segun IFR
(Instrument Flight Rules), y mester tin un spotlight potente di 25 million candlelight, y

tambe un GPS.

Lo mas importante, ta cu Polis di Aruba awor ta pidi pa e Helicopter bin cu un sistema

di FLIR Imaging System.

E sistema FLIR ta nifica “Forward-Looking Infrared”. E camera no ta djis mira
imagennan den scuridad total, sino e ta un camera ‘thermal’. Pues e ta detecta e calor
riba e curpa humano, riba auto, of hasta animalnan.