Page 40 - ON FEB 2

Studiante di Universidad impresiona pa accesibilidad y
vision di Prome Minister Mike Eman

Wednesday, 01 February 2017 21:00
Comparti

Como un studiante di derecho na Universidad di Aruba y como un ciudadano, Larisa Leeuwe ta
‘sumamente contento y gradici cu Prome Minister Mike Eman’ pa e manera con e mandatario ta tuma
tempo
y interes pa reuni cu studiantenan di Universidad di Aruba. E siman aki e mandatario a duna un
presentacion, pero tambe a duna oido na punto di bista, intercambiando di idea y te hasta dunando nan
conseho. Leeuwe ta un di varios studiante Arubiano cu hunto cu un grupo di studiantenan internacional
for di University College Utrecht, ta trahando riba diferente topico, tur aplica riba e model di Aruba cu
enfoke riba desaroyo sostenibel.

Minister President Eman a duna un splicacion di e historia di Aruba, di e desaroyo cu a bin ta tumando
luga y tambe di su vision pa e futuro di nos pais. “Nos ta hopi contento pa e informacion cu Prome
Minister a comparti cu nos y den e proximo dos luna y mey nos ta bay traha den colaboracion pa yega na
diferente strategia con nos por yuda den e desaroyo sostenibel di Aruba,” asina Leeuwe a splica.
E universitarionan local y for di Hulanda, cu na su luga tambe ta bin di diferente pais rond mundo, ta
forma parti di e Caribbean Studies Course cu ta tuma luga anualmente den colaboracion cu Universidad
di Aruba. E iniciativa di Ministerio di Asuntonan General, Ciencia, Innovacion y Desaroyo Duradero,
Cultura y Sector Primario, bou liderazgo di Prome Minister Mike Eman, ta forma parti di e vision pa
desaroyo un di tres pilar economico pa nos pais pa medio di un industria di conocemento. E obhetivo ta
pa nos profesionalnan local por competi riba nivel internacional facilitando Aruba como hub entre
Europa, Norte y Suramerica.

E atencion ricibi for di e prome mandatario a laga Larisa Leeuwe realisa cu su bos y opinion tambe ta
conta den e direccion cu nos isla ta tuma. Leeuwe a comenta cu “Nos como studiante y como hobennan
profesional ta wordo integra den e proceso di yega na un desaroyo sostenibel di Aruba.” E ta kere cu e ta
conta tambe pa e participantenan di e programa di intercambio internacional. “Como studiante y hoben
profesional di afo nan ta mira con e desaroyo na Aruba ta tumando luga y ta bay bek nan pais y ta conta
kico ta pasando na Aruba.”
Por ultimo Leeuwe a gradici Prome Minister Eman pa a saca tempo di su agenda ocupa pa bin y comparti
informacion y conseho cu nan. E ta tuma nota di e humildad di e mandatario y tambe a keda inspira pa e
dedicacion cu Eman tin pa bienestar di Aruba y su pueblo.