Page 37 - MIN ON

Ricibi regalo fabuloso a cambio di bo donacion pa Imeldahof

Wednesday, 14 December 2016 18:06
Comparti

Mas di 200 regalo ta wardando riba un doño fin di siman aki den Caya Grandi. Tur loke ta necesario ta
saca man pa bo prohimo yudando e muchanan di Imeldahof cu un obheto ainda den bon condicion cu
abo no mester di dje mas. ‘T’Aki Tin’ hunto cu comerciantenan di centro di ciudad a uni forsa pa yuda e
fundacion local.

Tin perfume, facials y make up, certificadonan na balor di 150 Florin, bril di solo Rayban y hopi, pero
hopi mas, demasiado pa menciona. Duna y haya bek den Caya Grandi diasabra awo. Pa e recaudacion
por ta mas productivo y e muchanan haya loke mas nan tin mester, organisadornan di ‘T’Aki Tin’ a
compila un lista cu e necesidadnan. Naturalmente tur paña, coi hunga y otro obheto den bon condicion
ta bon bini. Pone atencion si bo tin lo siguiente den cas y bo no ta usa mas: maletin preto pa scol
(bovenbouw), calculator (MAVO), skeiro di cabey, sandalia size 8 pa 10 (mucha muhe), sandalia size 3 pa
7 (mucha homber), zwempak pa mucha muhe di 7 pa 15 aña y pijama tanto pa mucha muhe, como tambe
pa mucha homber. E tiendanan cu ta cooperando cu e accion bunita aki y a facilita premionan ta:
Angelo’s, First Class Design, Sams, Win Me, Shoe Baloo, Dufry, Aruba Aloe, Bon Habon, Pastechi House,
La Linda, La Moderna, Kok Optica, Penha, MAC, Victoria’s Secret, Maggy’s, Berkshire Polo Club Style &
Colors, Totto, The Athtlete’s Foot, X-Qlusive, Sport Caribe y De Wit Stores. E punto di recoleccion di
donacion ta diasabra riba Plasa Daniel Leo. Aki tin un tent caminda representantenan di fundacion
Imeldahof ta presente pa ricibi e articulonan, pero tambe pa brinda informacion na tur cu ta desea di
haya sa mas. Pa mas informacion, bishita pagina di Facebook: T’Aki Tin.