Page 7 - MIN ON

Celebracion di e di 14 aña di oficialisacion di Papiamento
tabata festivo, educativo y ameno… Pabien Aruba!

Wednesday, 24 May 2017 07:07
Comparti

Fundacion Lanta Papiamento (FLP) a celebra e di 14 aña di oficialisacion di Papiamento y su di 8 aña di
existencia cu un anochi balansa. “Pabien Fundacion Lanta Papiamento y sigui cu e bunita trabou”, tabata
expresion di algun hende cu tabata presente dialuna na Biblioteca Nacional Aruba.

Michelaine Abreu a habri e anochi, cantando nos Himno di Aruba, estilo a capella. Sra. Etlien Croes,
presidente di Fundacion Lanta Papiamento a duna un palabra di bon bini na tur esnan presente. Sra.
Croes a elabora den su speech cu oficialisacion di un idioma so no ta nifica nada, si e pueblo no ta balor’e.
Sra. Croes a pidi esnan presente pa hiba e mensahe rond, cu nos mester ta mas consciente di e balor cu
un idioma tin pa su pueblo. E balor di identificacion, e balor educativo y e balor cultural. Dayenne Gibbs,
cu ta un alumno di Scol Multilinlingual Colegio San Hose, a alegra e anochi, declamando dos bunita
poesia skirbi pa su wela Mercedes Petrochi. Ramon Todd Dandaré Mag. Ling., un di e pilarnan den e
lucha pa reconocemento di Papiamento, a presenta un charla di kita sombre skirbi pa Joyce Pereira,
kende pa motibonan inespera y fuera di su control, no por tabata presente. Ramon a elabora,
reemplasando Joyce, riba e articulonan di e ley di oficialisacion di Papiamento, su puntonan positivo y su
puntonan negativo y discriminatorio. Pronto FLP lo publica e ley di oficialisacion traduci na Papiamento.
Drs. Merlynne Williams ta docente y investigado di idioma na IPA y ta miembro di directiva di FLP.
Desde 2010 Sra. Williams ta haci investigacion den cuadro di Proyecto Scol Multilingual. Merlynne a
presenta resultado di un investigacion comparativo entre e programa multilingual (idioma di instruccion
ta Papiamento) y e programa tradicional (idioma di instruccion ta Hulandes), cu a pone e publico
reacciona cu hopi positivismo.

Resultado ta mustra cu na final di klas 4, e alumnonan den e scolnan multilingual ta score
significativamente miho riba habilidadnan critico di siña compara cu e alumnonan den e scolnan cu
programa tradicional. Maureen Molina-Luidens ta un Master den Educacion cu specialidad Papiamento,
trahando na Departamento di Enseñansa. Maureen a presenta e Manual di Gramatica di Papiamento.
Hopi hende ta ansioso pa cumpra e buki valioso aki. Cesar Kelly ta un docente di EPB Hato y Cesar a
splica: e uzo di e forma plural -NAN, p.e. e autoNAN. El a presenta diferente frase incorecto y frase sin
sentido cu ta sali tanto den corant, como riba Facebook. Sr. Kelly a splica e regla di plural hopi cla pa
medio di Powerpoint. E publico a reacciona agradecido pa e presentacion educativo aki. Tabatin hopi
interaccion. Mientras cu FLP tabata parti bolo y biña pa celebra y recorda e logro aki, sra. Ludwina
Geerman a declama un bunita poesia. Pa completa e anochi bunita aki, FLP a rifa 5 premio atractivo. Na
final e publico a participa den un quiz traha pa un docente di Papiamento, Juffrouw Candy Dirks.
Juffrouw Candy lo coregi e quiznan na cas, pa asina por saca dos ganado. FLP lo avisa e ganadonan via
nan telefon/e-mail y publica nan nomber via e medionan di comunicacion. E publico tabata hopi
entusiasma cu pregunta y comentario. Fundacion Lanta Papiamento ta gradici tur hende cu a haci e
anochi aki agradabel y inolvidabel. Sin laga afo e miembronan di prensa y tur hende cu a propaga e