Page 43 - AHATA
P. 43
Recientemente nos den parlamento a trata e fondo di TPEF (Tourism Product
Enhancement Fund) y pa loke ta destinacion di e fondo aki. Den e reunion a bin dilanti cu
un parti di e fondo lo ser destina pa un boardwalk di Ritz Carlton pa Malmok.
Esaki sigur pa mi persona ta un bon noticia den miras di un mocion entrega durante
tratamento di presupuesto 2018, unda ta pidi Minister Dangui Oduber pa pone atencion
na e area aki debi cu hopi hende local y tambe turista ta haci uso di e zona aki pa
actividadnan físico y e area aki a bira uno peligroso pa esnan cu ta haci uso di e zona aki.
Y awor esaki ta bay haya forma y lo brinda e usadornan (ciclistanan, peaton) seguridad
cu nan por haci movecion sano den un zona bunita pero tambe sigur. Y banda di esaki
tambe lo percura pa iluminacion te cu na e faro di Westpunt.
Atencion pa San Nicolas
Banda di esaki mi persona a pone atencion na area di Lago Heights te cu Baby Beach,
unda tambe por destina esaki den futuro pa un boardwalk. E grato noticia cu nos di
parlamento a ricibi ta cu su Excelencia lo haci lo maximo pa aloca fondo pa crea e area
aki den un boardwalk cu ta garantisa seguridad di esnan cu ta usa e caminda aki pa
movecion sano y sigur esnan di ciclismo y ta duna un bunita bista na e turistanan cu ta
bishita Baby Beach y Rodgers beach y ta duna atraccion pa mas inversionista aki na San
Nicolas y e sector hotelero.
Desaroyo di otro areanan
A enfatisa cu e producto Aruba ta un totalidad y no dos area so. A urgi pa pone atencion
na mas area manera Hooiberg, Ayo Rock Formation, Andicuri, Daimari, Conchi y tambe
Parke Nacional Arikok. Hooiberg mester drecha e area y haci esaki mas sigur y atractivo.
