Page 47 - AVP

Tambe a cuestiona den e carta aki e motibo y escogencia di cursonan na Merca, mientras
Cuerpo di Bombero di Aruba ta atene su mes na otro codigo/otro normanan di un sistema,
cu ta esun Hulandes, cu nan mester traha cun’e.

Tambe nan ta preocupa p’e forma con ta inverti e fondonan, cu den Gobierno t’asina
limita, y ta mira cu den Brandweer tampoco tin prioridad ni transparencia y cu t’e forma
consistente di e escogencia robes na momento cu tin cu inverti.

Parlamentario Robert Candelaria ta menciona algun di e puntonan cu den su opinion ta
algun di esnan mas importante cu e Minister tin cu adresa rapidamente, cual t’e falta
mantencion.

Den e carta cu Cuerpo di Bombero a manda ta menciona varios truck, incluyendo algun
na Aeropuerto cu ta di sumo importancia pa cumpli cu e Grade/Standard Internacional cu
nos Aeropuerto tin actualmente.

Si pais Aruba no por garantisa esaki pa falta di mantencion y/o training na Aeropuerto,
specificamente e trucknan, ta trece un riesgo cu por “down grade” Aeropuerto di Aruba.

Locual cu por saca afo di e carta aki den su totalidad ta cu e liña completo ta indica cu e
prioridad no ta cla of no t’ey mes, falta di direccion, falta di maneho di Minister pa cu/y
den e Cuerpo di Bombero mes ta indiscutibel.

Pa finalisa Parlamentario Robert Candelaria ta haci un yamada na Minister Andin Bikker
pa atende cu e problematicanan rapidamente p’asina cuida nos Cuerpo di Bombero tanto
na Aeropuerto como e Cuerpo completo mirando cu esaki t’e esencia di nos economia,
nos turismo, cu ta algo cu nos no por permiti n’e momento aki pa nos baha di grading pa
falta di mantencion. A tuma contacto cu varios miembro di Cuerpo di Bombero p’asina
conoce e origen di locual t’e contenido di e carta y lamentablemente t’e berdad cu ta
bibando actualmente y e urgencia ta grandi p’e Minister atende cu esakinan, garantisando
e nivel, uzando fondo na bienestar di e Cuerpo y zorg p’e maneho y opleiding di esnan cu
ta haya funcion den Cuerpo di Bombero tin esaki, sa nan trabou y por dirigi manera
mester ta.