Page 11 - RDA 1ST JUNE 2017

Richard Branson Y Carbon War Room Ta Elogia

Aruba Y Su Gobierno A Felicita Arubianonan Y

Companianan Di Utilidad

Durante e ceremonia importante pa groundbreaking di e Sunrise Solar Park, discursonan
tabata un formalidad, mas sinembargo e mensahe cu cada un a trece dilanti a keda resona
den mente di esnan presente.

Nan ta manifesta e progreso grandi cu Aruba a conoce den e tereno di inovacion y
sostenibilidad, pero tambe ta duna merito na nos profesionalnan local pa nan aporte
importante den e logro aki.

E parke solar cu den 8 luna lo ta cla y ta bay produci 5.9 MW di energia limpi ta ubica na
Lago Heights. Diaranson mainta a tene e groundbreaking den un manera simbolico
caminda a laga crece e prome panel solar riba tereno.

Prome cu e parti aki, y den presencia di Gobernador Alfonso Boekhoudt, Minister di
Energia ing. Mike de Meza tabata entre promenan pa hiba palabra.

“Awe mas cu nunca nos tin companianan di utilidad cu ta kere y ta wak. Nan ta haciendo
esaki posibel y nos por ta hopi orguyoso di esey.

E cooperacion aki cu e companianan di utilidad ta hopi importante; nan t’e ingenieronan,
nan t’e profesionalnan cu nos mester pa haci e trabou,” asina Minister de Meza a bisa
recordando con 8 aña pasa mester a convence nan di tur e motibonan pakico e caminda di
sostenibilidad tabata esun mihor pa Aruba.

‘Nos tabata pusha nan y nan tabata bisa nos: “Wanta, ban wak bon kico nos ta haciendo”;
y awendia nan ta pusha nos. P’esey ta great ora bo tin bo mesun expertonan local cu di
berdad ta kere y ta ehecuta cosnan di un manera hopi profesional y integral.’