Page 13 - ATA

Aruba Tourism Authority a lansa un campaña den e espirito di fin di aña ‘Danki Aruba’.
Pa medio di e campaña aki ta reconoce heroenan cu ta haci di Aruba uno Dushi pa
Biba y como tal uno Dushi pa Bishita. E cuidadano ehemplar cu ta wordo reconoci ta
Percy Phelipa, un persona cu semper ta dedica su tempo liber pa brinda su aporte na
nos muchanan den comunidad y cu ta miembro activo na YMCA San Nicolas. Ta
reconoce Percy paso e tin mas cu 30 aña ta guia e muchanan y e ta un persona cu ta
pone prioridad na educa e muchanan cu respet y ta motivanan pa haci deporte. Percy
ta un persona hopi stima pa e muchanan di YMCA San Nicolas y ta hopi respeta pa
miembronan di e organisacion. Percy ta stima su muchanan na YMCA San Nicolas y e
ta guianan y mustra nan e importancia di e norma y balornan den nos comunidad. E ta
educa su muchanan pa asina nan siña respeta nan mes y otronan, pa nan por bai den
bon caminda den futuro. Percy ta un di miembronan cu ta ireemplasabel na YMCA San
Nicolas.

YMCA Aruba a wordo funda na aña 1956 como ‘Young Men’s Christian Association’.
YMCA Aruba ta un fundacion Christian cu ta dedica na guia su miembronan den e
caminda di fe Christian. YMCA Aruba ta habri su portanan pa personanan di otro
religion y tambe pa esnan cu no tin religion. YMCA Aruba ta un fundacion boluntario y
ta brinda guia y sosten na nos muchanan completamente gratis. YMCA Aruba a wordo
aserca pa asina honra e ser humanonan cu ta dedica nan tempo na trabou boluntario.
Rachel Croes, cu ta e Secretaria General di YMCA Aruba tabata e persona cu a honra
Percy Phelipa pa su añanan di dedicacion y trabou boluntario. Tambe a hiba palabra
Anky Vrolijk, cu ta e Secretaria di e Board di YMCA Aruba cu conoce Percy pa hopi
aña. Percy a haya un sorpresa y a sinti emociona cu e honramento. Percy a sinti hopi
emocion y gratitud pa a wordo reconoci como un persona dedica cu ta traha pa nos
comunidad y pa haci di nos isla uno simplemente mas dushi pa biba riba die. Percy ta
un ehempel pa nos comunidad y su mensahe pa ta pa hendenan haci mas trabou
boluntario pa asina yuda esnan cu mester di e ayudo.

Ta danki na e esfuerso boluntario na nos isla, e persistencia y bon boluntad nos isla ta
sobresali riba tur otro nacion mundialmente. E factor principal di nos turismo ta nos
hendenan, nos mes, y pesei A.T.A. kier presenta un mensahe di refleccion e aña aki pa
medio di ‘Danki Aruba’. Cuminsando yamando danki na un persona ehemplar cu ta
Percy Phelipa. Danki Percy. Semper cu un sonrisa a comparti y duna un otro un
humilde man, dunando su aporte aña den y aña afo. Esakinan ta sigur caracteristicanan
cu mester pa no solamente sigui riba un turismo duradero y saludabel, pero pa
simplemente nos comunidad por biba na un manera felis, den harmonia pa cu un cu
otro.

Subi online ariba www.dankiaruba.com pa nomina bo heroe y sigui e campaña di ‘Danki
Aruba’ ariba e pagina di Facebook y Instagram di Oficina di Turismo Aruba. Den
nomber di Aruba Tourism Authority nos kier gradici cada un di nos hendenan pa nan
lucha incansabel durante 2016 y kier desea nos comunidad feliz dianan di fiesta y un
One Happy 2017.