Page 2 - MIN ARENDS 6 APRIL 2017

Camara di Comercio awor ta permiti tur 8 partido den debate

Posted on 04/6/2017 11:29 am AST | Updated on 04/6/2017 11:30 am AST

ORANJESTAD – Cambiando di formato, Camara di Comercio a dicidi cu ta laga tur 8 partido politico
registra actualmente, participa na e prome debate dia 8 di juni proximo. Asina e presidente di Camara di
Comercio Ernst Mohammed a informa diahuebs mainta. Ta trata di e partidonan ABO, AVP, MAS, MEP,
POR, PPA, RED y UPP lo ta e partidonan cu ta participa na e prome debate. A opta pa cambia esaki debi
na e critica y comentario cu a ricibi den e dianan aki, tanto di comerciantenan y pueblo. “A evalua esaki
den un reunion den nos board, nos tabatin nos mesun debate. Nos a bin unanimamente na e decision
aki” Ernst Mohammed presidente di KVK a bisa.

INICIALMENTE TABATIN TRES PARTIDO SO

Inicialmente tabatin tres partido cu por a participa, cu ta AVP, MEP y POR, y e otro partidonan a base di
un encuesta, lo por a participa. Esey a causa basta critica den comunidad y sigur den seno politico di e
otro partidonan cu no tabata esunnan menciona. A reacciona bisando cu a pensa cu mirando cu den
POR tabatin dos miembro cu ta den parlamento y ta registra, cu nan lo por a participa, como POR. Esey
awor ta resulta di no tabata e plan mas practico.