Page 33 - Djasabra 22 Desember 2018.pdf

Djasabra 22 Desèmber 2018 37
BONECO a

pidi minister
Koeiman pa
dialogá en bes
bai korte ku
trahadónan

SOAW
WILLEMSTAD.- Sindikato
BONECO a manda un karta pa
minister di SOAW Sr. Henley
Koeiman relashoná ku e
situashon di trahadónan den
edifisio di Tauber Building.
BONECO ta pidi minister
Koeiman di SOAW pa en bes di
bai korte ku e trahadónan den
akshon pa buska e kaminda di
diálogo.
BONECO a indiká ku nan
a komprondé dje problema
serio ku trahadónan na
SOAW ta konfrontando kuné
pa ku e edifisio di SOAW den
Punda, kual no ta kumpli
ku e reglanan di seguridat i
higiena.
BONECO ta ruman di
sindikato ABVO, i semper a
skohe e kaminda apropiá di
diálogo promoviendo rèspèt
mutuo i konfiansa pa yega
na solushon apropiá i sin
resultado te awe.
BONECO ta solidario ku
trahadónan di SOAW.
P’esei direktiva di BONECO
ta haña straño ku hustamente
un minister ku ta dirigí un
minister no ta kumpliendo
kabalmente ku entre otro
leinan ankrá entre otro
den e Ordenansa di Lei di
Seguridat 1958 i ku SOAW i
minister mester tin e funshon
di ehèmpel pa komunidat i
mas ainda pa empresanan
i kompanianan ku tin
edifisionan unda trahadónan
ta laborá dignamente.
Banda di esaki, e minister
tin e rekursonan humano
kapasitá i kualifiká den su
propio ministerio i ku por
determiná ku en bèrdat e
edifisio di Tauber Building no
ta kumpliendo ku lei.
Ademas ku minister a
kuminsá ku kaso kontra
trahadónan di SOAW ku ta
saliendo pa nan derechonan.
Teniendo kuenta ku esaki,
BONECO a hasi apelashon
urgente na minister pa no bai
korte ku e trahadónan ku ta
den akshon, pero pa drenta di
inmediato e proseso di diálogo
a base di análisisnan hasi ku
ophetividat, rasonabilidat
i sin emoshon, atraves di
rèspèt mutuo entre minister,
ABVO i e grupo di servisio
di trahadónan. E kaso
den korte ayera a terminá
kaminda partidonan ta bai
sinta na mesa i pa yega na
un solushon.