Page 27 - FDLP

Campeonato Balashi A Continua Cu Sorpresa

 Deporte
- 12/08/2019

Diabierna den e fin di siman cu a pasa campeonato Balashi a mira otro sorpresa. Den e
confrontacion Sport Boys DT – Old Parr DT ningun hende por a kere cu den pito Sport
Boys DT lo laga Old Parr DT den tereno cu e score di 13 pa 12.

Si wak e wega completo Old Parr DT te cu e pen-ultimo tanda tabata e equipo dominante,
pero den tanda 5 cos a bolter y Sport Boys DT tuma e bentaha pa laga nos amigonan di
Old Parr DT un poco decepciona.

Den wega number 2, caminda Ottley’s Strikers DT a enfrenta Noord Stars “Pizza Hut”
DT, ningun persona a kere cu e wega lo ta preta. Ottley’s Strikers DT tabata representa cu
apenas 13 hungador, e minimo pa por hunga un wega y Noord Stars “Pizza Hut” DT
tabata bon representa cu nan trabuco nan manera Pat Hughes y e unico instructor certifica
den domino na Aruba, Andy Farro.

Pero Domino ta wordo hunga riba mesa y eynan experiencia ta conta. Wel e wega tabata
bay bin pa ambos equipo. Nos por bisa cu Noord Stars “Pizza Hut” DT a pasa den wowo
di hangua y den final tog a logra e victoria cu e score di 13 – 12. P’esnan cu tin mas
conocemento di domino e resultado no tabata un sorpresa, pasobra historicamente Noord
Stars “Pizza Hut” DT tin hopi problema cu e domino di e muchanan di San Nicolas, cu
tur ora ta cla pa bay guera.