Page 8 - MIN VOS

AHATA purbando pa hotelnan tin 0

criadero di sangura

Posted on 04/17/2017 3:41 pm AST | Updated on 04/17/2017 5:04 pm AST

ORANJESTAD - AHATA ta haciendo tur posibel pa percura pa tin 0 criadero di
sangura den nan hotelnan. Recientemente AHATA (Jim Hepple) , DVG (Jerry
Starring) y minister di Salud (Alex Schwengle) a topa pa reuni riba e situacion di
sangura y Zika riba nos isla. Gobierno a suministra AHATA a ultimo cifranan
confirma, a repasa e esfuersonan cu ta haciendo y a gradici e organisacion di hotel y
turismo pa nan cooperacion y sosten den e esfuerso pa combati sangura y elimina
criaderonan.

GARANTIA DI AHATA

AHATA a garantisa Gobierno cu nan miembronan ta haciendo tur lo posibel pa colabora
cu esfuersonan pa conscientisa riba importancia pa hotelnan tin “0 criadero” y asina
sigura cu nan empleadonan y nan huespednan ta hospeda den un hotel liber di sangura y
di e enfermedadnan menciona. AHATA a compromete na ofrece Gobierno mas sosten
den cualkier esfuerso pa hisa e nivel di conscientisacion den e temponan nos dilanti, hasta
pa cuminsa prome cu e temporada di awasero mes.

CASONAN RAPORTA

Manera cu NoticiaCla.com a raporta caba recientemente, e casonan di personanan cu ta
bay nan dokter di cas, ta presenta sintomanan di keintura, rash, dolor di cabes, cu por
indica cu ta trata di un enfermedad transmiti pa sangura. Den e caso akinan ta e
enfermedadnan cu nan ta vigilando cu ta Dengue, Zika y Chikunguya. E casonan registra
y cu ta sospechoso ta mas den e areanan di San Nicolas, Savaneta, Santa Cruz y Pos
Chikito. Y esakinan no ta casonan confirma pa laboratorio.

CIFRANAN PRESENTA

Tin mas hende muhe cu a notifica riba e enfermedad aki y DVG ta pensa cu esaki ta pa
motibo cu e ser femenino ta yega dokter mas lihe cu hende homber. 65% di e casonan
sospechoso ta entre personanan di edad 25 pa 64 aña. E sintomanan mas tanto cu DVG
tin registra ta 1/3 parti di rash, 1/3 di keintura y mas tanto ta dolor di cabes.