Page 4 - UTITLITES

Casi 15 tecnico riba pia na substationnan den districtonan

Tuesday, 30 May 2017 08:24
Comparti

For di den oranan di atardi cu e prome yamadanan a cuminsa drenta na central di NV Elmar relaciona cu
baymento di coriente, inmediatamente a activa e tecniconan y specialistanan encarga cu e red di
distribucion di coriente pa revisa kico ta pasando.

Hopi lihe a descubri cu e fluho di coriente di WEB pa NV Elmar a baha drasticamente, locual a haci dificil
pa abastece e demanda di coriente di consumidornan y cu consecuencia conoci. NV Elmar a traha den
cooperacion masha estrecho cu WEB pa asina hunto percura di un banda pa stabilisa e planta na Balashi
pero asina cu e ta produci suficiente coriente, pa NV Elmar percura pa reanuda suministro normal bek
den tur districto. E reto tabata cu despues di reanuda algun bario, a sosode cu atrobe WEB tabata instabil
cu consecuencia cu mester a desconecta algun area. Di otro banda, NV Elmar ta gradici tur e casi 15
tecniconan y specialistanan encarga cu e red, cu tabata riba pia na e diferente substationnan den varios
districto.

Nan tabata pendiente di WEB pa hisa e cantidad di coriente cu ta manda pa NV Elmar pa nan por parti e
coriente bek riba nan red. Riba su mes e ta mustra masha facil pero ta un trabou conhunto esaki ta, den
cual tecniconan mester evalua diferente factor prome cu reanuda suministro pa evita daño innecesario.
NV Elmar ta pidi disculpa na tur su clientenan, pa tur inconveniencia cu e situacion aki por a causa nan.