Page 48 - MIN ON

Prome Minister Eman a topa Hoben studiante preparando su
cunucu pa cosecha

Tuesday, 07 February 2017 18:18
Comparti

Cu tin un generacion nobo hopi interesa den planta y sembra na Aruba ta keda demostra cada biaha mas
y mas. Den e recorido cu Prome Minister Mike Eman a haci diasabra ultimo, na Cunucu Pachamama na
Soledad, el a topa cu un hoben studiante di SPO, kende a demostra un entusiasmo grandi pa Agricultura.

Ta trata di Jadon Katra, di SPO Sta Cruz, kende tin un siman coriendo stage na Pachamama. E hoben
den apenas un siman cu e tin trahando, a capta henter e proceso di cultivo di e diferente productonan cu
ta produci. El a splica por ehempel cu den cada buraco di e “pilarnan” di palo ta hinca simiya di lechuga,
cu un pomp special. Via di un sistema di irigacion e awa friu ta cay den e pilarnan di palo y poco-poco por
mira con e lechuga ta cuminsa sali for di e buraconan. “Despues di 2 pa 3 siman e palo ta completamente
yen bo ta mira solamente e buniteza di lechuganan. Nos ta cosecha por lo menos 5 mil lechuga pa luna,” e
hoben a splica. E sistema pa cosecha lechuganan, el a splica, ta hydroponics, pero den tubo. E hoben ta
sinti su mes na cas den e trabou aki. “Tur dia tin trabou y mi ta siña hopi cos.” El a expresa cu agricultura
ta algo cu semper el a gusta y ta preparando su mes pa siña mas tanto posibel y pone esaki den practica
den su cunucu. “Mi ta bezig ta chapi mi cunucu na cas di mi ruman. Mi a traha e 'greenhousenan' caba y
mi ta bay concentra pa planta boonchi largo so.” El a splica cu e tin rond di 150 boonchi planta den pochi
sperando pa wordo planta den tera mes den e cunucu aki dos siman. “Mi gusta planta, e ta algo cu mi ta
haci for di tempo cu mi tabata chikito,” e hoben a bisa durante e bishita di Prome Minister Mike Eman.