Page 54 - AHATA
P. 54
Awe nos ta testigo di un waf di container ultramoderno na Barcadera; obranan infrastructural di mas grandi cu
nos a yega di conoce den e ultimo 30 añanan manera e Green Corridor; un hospital state-of-the-art cu ta forma
parti di un economia di conocemento.
“E posible crecemento economico cu a wordo premira pa 2018 na cuminsamento di aña lo no wordo realisa
mas y e perspectivanan economico pa futuro a wordo ahusta negativamente segun e estudio reciente di Banco
Central,” Sr. Arends a sigui bisa.
“Hopi comerciante ta expresa cu den termino di benta, e luna cu a transcuri tabata e pior september for di 2001
despues di 9-11,” segun Arends. E capitalisacion di sector priva riba e oportunidadnan nobo ta wordo frena
door di e ausencia di un vision economico, falta di pro-actividad y incertidumbre riba tereno fiscal.
“Economia ta un materia hopi sensitivo y e esfuerzonan dedica di Gabinete Mike Eman I y II pa diversifica
economia y brinda oportunidad ta bayendo perdi,” Parlamentario Arends a declara. “Señalnan cu Gobierno a
bin ta manda pa sector priva durante e prome aña di gobernacion a kita tur confiansa den nos economia y clima
di inversion.”
Segun Sr. Arends, e weso di lomba di diversificacion di nos economia, ta empresanan chikito,
inversionistanan local y trahadornan independiente. “Te awor Gobierno no a sa di presenta un maneho
specifico pa e grupo aki y no a hasi nada pa amplia e acceso na conocemento y acceso na capital,” Sr Arends a
bisa referiendo na e iniciativanan den e area aki durante gobernacion anterior.
E Business Perception Index a mustra un aumento den e prome cuartal di aña 2017. “Esaki ta confirmacion di
e confianza cu tabata tin den nos economia y e maneho economico cu a wordo hiba. Awe nos ta biba un otro
realidad,” Sr. Arends a bisa
Despues di un serie reunionan entre mimebronan di fraccion di AVP cu representantenan di sector priva, Sr
Arends ta reitera cu como gobernante bo tin e obligacion di duna confiansa, stabilidad y perspectiva.
“Esakinan ta completamente ausente aworaki,” e la finalisa bisando.