Page 67 - MIN ECEM

ATA a participa na seatrade cruise global

Sunday, 09 April 2017 18:03
Comparti

Recientemente a tuma luga na Fort Lauderdale, Merca un di e conferencianan mas importante pa loke ta
e industria di crucero, esta Seatrade Cruise Global.
Aruba Tourism Authority conhuntamente cu Aruba Ports Authority y otro partnernan den e industria di
crucero aki na Aruba a participa na e conferencia.
Durante e evento, Seatrade Cruise Global ta trece hunto e liñanan di crucero y demas representantenan
di producto y servicionan rond di e industria, manera destinacionnan, puertonan, tour operadornan,
associacionnan di e industria, etc. E conferencia a ricibi riba 10,000 bishitante y mas di 700 compania of
organizacion cu a exhibi nan producto y of servicionan.
E conferencia tambe ta duna indicacion di e futuro di e industria di crucero. Segun Cruise Line
International Association (CLIA) ta spera cu un total di 25.3 miyon pasahero mundialmente lo tuma un
cruise durante 2017. Na 2007 e total di pasahero cu lo tuma un cruise tabata 15.8 miyon, cual ta
demostra un crecemente significante den apenas 10 aña. Tambe por nota e confiansa cu tin den e
industria cu inversion di 6.8 biyon dollar den barconan nobo pa 2017.
E delegacion di Aruba a reuni cu ehecutivonan di e liñanan di crucero di mas importante manera Royal
Caribbean Cruises y Carnival Cruise Lines. Durante e reunionnan aki a comparti cu e delegacion e
diferente inversionnan y demas proyecto cu ta contribui na e industria y e experiencia di pasaheronan di
crucero. Tambe a follow up riba e high season y e resto di 2017 ya cu e aña aki ta uno sumamente positivo
cu alrededor di 750 mil pasahero proyecta pa bishita nos isla. Ademas ta sigui di cerca e desaroyo di e
comentarionan di e pasaheronan di crucero cu ta bishita Aruba. E delegacion a confirma un biaha mas e
popularidad di nos isla cu puntuacion halto, a base di encuesta di e lineanan crucero, cu ta pone Aruba
entre e top 3 di miho destinacion den Caribe y den e caso di Royal Caribbean, Aruba a resulta di ta e
number 1 destinacion den Caribe.
E conferencia tabata uno exitoso cu ta yuda pa sigui desaroya e industria di crucero di Aruba na un forma
positivo cu 2018 proyectando preliminarmente di ta sumamente positivo cu un crecemento di 14%
compara cu 2016.