Page 5 - KPA

Asesinato Jaburibari un sla si, pero no

nubia scur riba conferencia di polis

Posted on 05/3/2017 11:21 am AST | Updated on 05/3/2017 11:22 am AST

PALM BEACH – E asesinato dialuna marduga, riba e prome dia di e conferencia di
comisarionan di polis den region, sigur tabata un sla. No necesariamente pa e
conferencia, pero pa cuerpo policial. Asina organizador di e conferencia, comisario Trudy
Hassell a bisa NoticiaCla.com . “Naturalmente e ta un sla pasobra mi ta kere cu algo
asina lamentable y tristo ta trece un mancha scur riba nos esfuerzo pa desaroya nos
cuerponan na un manera positivo” Hassell a bisa. Pero no por bisa si cu tin un nubia scur
ni riba cuerpo policial ni riba e conferencia. E ta algo cu a pasa cu ta lamentable si segun
e comisario. Mientras cu enberdad e ta un shock, cuerpo ta absorba asina hopi shocks y ta
sigui dilanti.

Conferencia di polis cu meta pa combati

crimen organiza transnational

Posted on 05/3/2017 11:22 am AST | Updated on 05/3/2017 11:24 am AST

PALM BEACH – Manera ta conoci dialuna na Hilton Aruba Caribbean Hotel a
cuminsa un conferencia di comisarionan di polis di region na Aruba, cu ta caba dia
4 di mei proximo. Comisario Trudy Hassell ta encarga cu e evento aki y ta trata
primordialmente e globalizacion y crimen organiza transnational. Esaki a tuma
lugar riba peticion di Aruba segun Hassell mes a splica NoticiaCla.com. E ta encera
tur e crimennan cu ta pasa frontera, cu no ta keda na e paisnan. Algo mundial cu ta
cuminsa na un pais pero tin ‘proyecto’ tur rond di mundo, y wak con pa actua
contra nan. Ademas tin esfuerzo pa companianan internacional profila nan
productonan pa e cuerponan, pa tira un bista kico tin riba e avansa di e tecnologia
pa logra combati crimen.

META DI E CONFERENCIA

Na final di e conferencia, e comisarionan di polis lo bay cera un combenio di cooperacion
entre Caribe, y traha un plan strategico con pa ataca e problema di criminalidad den nos
regio. Esey ta basicamente e meta principal. Mientras cu e conferencia ta
primordialmente dirigi na comisarionan di polis, otro polisnan y instancia hudicial tambe
ta invita pa presenta. Un total di 15 tayer ta wordo duna den e 4 dianan aki, unda cu tur
personal di polis tambe por presenta. Diferente topico ta wordo presenta manera
cybercrime, forensics, leadership policial y mas cu ta wordo trata, cu e meta pa upgrade
nos hendenan riba diferente tereno. Tin tambe e aspecto di DNA cu ta wordo trata tambe.