Page 41 - ON JAN 27

Manifestacion cultural ta mustra sentido di patriotismo y
union Prome Minister Eman hunto cu Gisette Croes a rindi

honor na Betico Croes

Thursday, 26 January 2017 17:18
Comparti

Como un ehempel di union, respet y patriotismo, Minister President Eman a subi escenario den
compania di Gisette Croes, yiu di Betico Croes (dfm). Hunto a rindi honor na e bida y legado di nos
Libertador. Premier Eman a bisa cu e sigur ta compronde e sacrificio cu Guisette, mescos cu otro famia di
lidernan grandi, ta haci na fabor di pueblo.

Gisette a gradici Prome Minister Eman, mescos cu e comision cu a organisa tur e reconocemento bunita
cu su tata a ricibi riba su fecha natal.Tabata un momento di sorpresa casi na final di e Manifestacion
Cultural organisa pa rindi honor na Betico Croes riba su fecha natal y riba e plasa cu ta hiba su nomber
ora su yiu muhe a subi escenario cu Prome Minister Mike Eman. Despues di gradici tur e artistanan cu a
contribui na e anochi aki, e mandatario a expresa cu ta "un honor y un merito mereci na un gran luchado
di nos pais. Pami como yiu cu tambe a experencia e perdida di un tata, hopi bes bo ta puntra bo mes con
bo ta yena e bashi aki. Mi ta sigur cu algo cu ta yuda un famia asina ta ora mira e gran reconocimento cu
e pueblo Arubano ta duna pa e gran labor, dedicacion y sacrificio di nan tata.” Seguidamente el a pidi
henter e publico presente pa lanta para y duna un aplauso duro “cu Betico Croes por tende te na shelo
aya”. Prome Minister Eman den su discurso riba escenario a papia di e union cu e ta sinti riba e anochi
aki.

"Awe nochi Aruba a bini hunto pasobra nos ta den union di celebracion di talentonan special cu nos
Creador a brinda nos pais cune. Aruba ta chikito, pero poco pais por bisa cu nan tabatin lidernan cu no
solamente a cambia e panorama constitucional di e pais, pero tambe nan tabatin e entrega total y dia nan
a fayece no a laga placa na abundancia atras pa nan yiunan y famia, pero si e legado di un gran lucha cu
nos tur ta orguyoso di dje. Pami tabata un honor di tabata parti di e celebracion pa honra bo
Papa,”Prome Minister a expresa brasando e yiu muhe mayor di Betico Croes. Gisette Croes, kende a bisa
cu el a wordo sorprendi pa e invitacion pa subi escenario, a cuminsa na gradici Prome Minister Eman pa
su presencia y e comision organisador di e evento encabesa pa Robert Maduro. `E dia di awe ta yena nos,
como yiunan di Betico, cu hopi emocion. Boso, e musico y artistanan cu a expresa nan mes riba
escenario, dedica na e dia di awe, ta yena nos cu emocion y consuelo pa e amor pa nos Tata cu ta biba den
boso curason,” Gisette hopi emocional a expresa.