Page 46 - AHATA

Minister Xiomara Ruiz-Maduro:

ORANJESTAD (AAN) – Dos tema Minister di Economia y Finanzas, mr. Xiomara Maduro,
tabata tin riba agenda den conferencia di prensa di gobierno Dialuna.

E mandatario a subraya cu nan ta dos tema relata na otro, di cual un ta e Reunion di
Conseho di Reino, cu a tuma lugar siman pasa Diabierna, tocante e KB cu a crea hopi
speculacion y cu no a bin.

E di dos tema ta e parti di supervision di CAft, referente na e Fondo di Social Crisis
Plan. Minister Ruiz Maduro a referi na e declaracion di Prome Minister tocante e reunion
aki, cual resultado ta cu Gobierno di Aruba ta haya mas tempo y espacio pa traha riba e

retonan financiero cu nos pais tin.

E titular di economia y finanzas a declara tocante loke a sali den media, cu gobierno a
haya un deadline cu ta dia 18 di October pa cumpli cu tur cos. El a reitera locual prome

minister a declara, cu den e reunion mes, nada di esaki a bin dilanti y te ainda Gobierno
no a haya e carta di e Secretario di Estado sr. Raymond Knops, den cual a pone un of
otro deadline.

E mandatario a señala cu si acaso tin un deadline mes, Aruba semper a sa di
contesta na tempo. Gobierno ta keda warda riba e carta aki.

Minister Ruiz Maduro a acentua cu Aruba ta keda cumpli si, cu e protocol. Den e

protocol aki tin e normanan financiero cu Pais Aruba ta bay tene su mes na dje, y door
di e cambionan extra cu a bin den Parlamento, e carta cu a wordo manda pa Conseho di
Minister di Reino y Parlamento, dia 17 di September, gobierno a contesta cu nan no ta
bay manda e cambionan aki pa ratifica.

E dignatario a señala cu e proceso di legislacion pa loke ta trata e ley aki a stop. El a
subraya cu na Hulanda no ta diferente cu na Aruba, y e ley aki ta stop y Aruba ta keda
traha riba su propio Organo di Supervision y Begrotingskamer pa pais Aruba, y tambe

ta mantene e supervision di CAft manera cu e ta.

El a señala cu e normanan na cual Aruba ta atene su mes na dje ta poni den e protocol.