Page 41 - KPA

Mr. Chris Lejuez ta premira cu MC Oz lo keda cera te dia su
caso bin dilanti

Friday, 09 December 2016 18:51
Comparti

"Mi cliente a admiti di a tene relacion sexual cu un mucha muhe menos di 16 aña di edad, asina ta Bo por
conclui for di esey cu el a haci su mes culpabel na violacion di ley", asina mr. Chris Lejuez a duna di conoce
awe durante un entrevista den e noticiero Noticia Cla Merdia via Power FM. E ta abogado di Ostrick Jansen,
conoci como MC Oz trahando na e emisora ey mes y acusa di actonan inmoral cu un menor di edad.

"Loke esaki ta nifica pe ta cu bo por conta riba cu por lo pronto e ta keda deteni, probablemente te dia cu su
caso bini padilanti", asina e abogado, considera un di esunnan mas popular den casonan penal, a duna di
conoce den su entrevista na radio. "Asina ta cu Pasco y Aña Nobo sigur e lo pas'e deteni".

E acusacion contra MC Oz ta di a tene relacion sexual cu un mucha menor di edad. "Den esaki e ley ta hopi
simpel, si un hende mayor di edad tene relacion cu un mucha entre 12 y 16 aña, esey riba su mes ta
castigabel. Hasta si el a gaña Bo cu e tin 17 of 18, hasta si su curpa a desaroya y cu Bo no por a ripara cu e
tin menos edad cu e ta aparenta, no tin ningun excusa. Ley ta bisa menos di 16 aña Bo ta castigabel", segun
abogado mr. Chris Lejuez.

Mas leu e abogado a sigui splica cu e ley ta traha pa protege e menor di edad, pues hamas por bisa cu un
relacion entre un mucha y un mayor di edad tabata boluntario y pa amor di nan dos. "E ley no ta hiba na
cuenta cu si Bo sa of Bo no sa cu bo partner ta menor di edad. E ley solamente ta bisa cu na momento cu Bo
tin un relacion cu un persona entre 12 y 16 aña, Bo ta castigabel....punto. Tur otro circunstancia, cu si e mes
kier, si ta un relacion amoroso, si el a gañabo, si Bo a haci'e, Bo a viola ley y Bo ta castigabel".

Segun experencia di e abogado, e ta premira cu despues di e prome 10 dianan di detencion na Warda di
Polis, cu lo prolonga e detencion atrobe y cu lo mand'e KIA pa e warda riba tratamento di su caso na Corte.

E ley den e caso specifico aki, esta ora di comete acto inmoral cu un menor di edad, ta papia di un castigo
maximo di 8 aña di prizon.