Page 16 - AWEMAINTA

16 AWEMainta
Parlamentario Sue-Ann Ras (MEP):
“Nos falta hopi ainda pa haci den igualdad di genero”
“Awe ta un dia cu hopi di nos hende muhernan ta ricibi rosa, of ta
haya yen di bunita mensahe y ta pone hopi dedicacion riba social
media, cu ta nifica un detaye di reconocemento p’e genero femeni-
no”.
Segun Parlamentario Sue-Ann Ras; “Ta bon pa enfatisa cu nos no
mester perde e berdadero motibo di e conmemoracion aki y ta bon
pa nos para keto na algun cifra y tambe vision, cu ta prueba sufici-
ente, cu nos ta hopi leu ainda.
E fecha di 8 di maart ta celebra anualmente como Dia Internacional
di Hende Muher y ta un luna ideal pa recorda cu falta hopi ainda pa
haci den igualdad di genero.”
ALGUN DATO ALARMANTE
Semper ta bon pa comparti algun di e motibonan, cu ainda mester
haci tur loke ta necesario, pa conmemora e dia aki y pa traha riba
un mihor futuro di genero.
1. Na mundo tin alrededor di 870 miyon di persona analfabeto
segun Unesco, y di esaki dos tercer ta muher, pues 65%.
2. Violencia contra muher ta sigui ta un tarea pendiente y Aruba no
ta un excepcion y ta mas bisto den e medionan di comunicacion.
Segun Nacionnan Uni, 35% di muher a sufri di e tipo di violencia
aki, pues 1 di cada 3 y den region di Latino America y Caribe ta
45%.
Fundacion Hende Muher den Dificultad a duna di conoce cu na
2018 a yuda 144 cliente y a duna alohamento den nan shelter na
24 señora y entre 25 cu 30 menor di edad, cu a yega hunto cu nan
mama.
3. Nacionnan Uni ta calcula cu mas di 30 miyon di mucha muher
menor di 15 aña ta den peliger di ta someti na mutilacion genital fe-
menino y mas 130 miyon ya a sufri e barbaridad aki riba nan propio
curpa.
4. Na mundo ta existi mas di 700 miyon di muher cu a casa ora
nan tabata mucha. Di esakinan 250 miyon tabata menor di 15 aña.
E mucha muhernan cu a contrae matrimonio prome cu cumpli 18
aña, tin menos probabilidad di termina su educacion y mas di sufri
violencia domestico y complicacion durante parto.
Diabierna, 8 Maart 2019
MERCADO LABORAL ARUBA
E hendenan muher ta sigui ocupa e empleonan mas precario y ta
representa un mayoria den mercado di trabou. Si analisa e dos
sectornan di for di dato di CBS Censo 2010: comercio, hotel y
restaurant (considera como 1 sector), tin alrededor di 9700 hende
muher, cu ta representa 42% di e muhernan cu ta traha den e dos
sectornan laboral aki.
Di e total cantidad di mama cu yiu di 0-17 aña cu ta traha, 43.3%
(alrededor di 4600) ta traha den comercio, hotel y restaurant.
Mas cu claro esaki tin su peso den desaroyo social emocional di un
mucha, mirando cu den e sectornan aki, no tin mucho flexibilidad
den orario, dia liber y orario largo di trabou, cual ta nifica, leu for di
cas y cuido general di e muchanan. Sin kita afor, cu ainda e hende
muher, ora e yega cas mester atende tambe e tareanan di hogar y di
cuido di e muchanan, p.e. huiswerk.
Pa hopi aña ta haciendo esfuerso enormemente pa duna potencia
n’e rol di muher como elemento catalizador di cambio den socie-
dad. P’esey nos ta impulsa e liderazgo femenino atrabes di diferente
forma, unda nos por sinti presencia di e hende muher den e medio-
nan, comite, institucion, conseho y asociacion.
“E resultadonan sin duda ta satisfactorio, pero ainda tin hopi pa
haci. Nos tin cu sigui promove e caminda pa diversidad di genero,
tanto den e seno di empresa como den entorno social”, Sue Ann
Ras a indica.
META DI DESAROYO SOSTENIBEL
Manera e lema di 2019 ta bisa: Dia Internacional di Hende Muher
nos mester pensa den igualdad, contrui cu inteligencia y inova p’e
cambio. No ta un secreto cu den cierto sector laboral, specialmente
pa loke ta trata futuro, manera; ciencia, tecnologia, inovacion,
infrastructura sostenibel, nos ta boga pa igualdad di genero y em-
poderamento di hende muher.
E logro di e metanan ambicioso di Desaroyo Sostenibel ta rekeri
cambio transformador, enfoke integra y solucion nobo, specialmente
den loke ta concerni e defensa di igualdad di genero y e empodera-
mento di tur muher y mucha muher.
Según Sue Ann Ras: “Si nos mantene e tendencianan actual, e
intervencionnan existente no ta suficiente pa haya un planeta 50-50
pa 2030”. P’esey ta crucial pa conta cu planteamento inovador di
parti di Gobierno como tambe sector priva, pa kibra cu e situacion
habitual y tradicional, elimina e bareranan structural y garantisa cu
niun muher y niun mucha muher ta keda atras.
“Inovacion y tecnologia ta brinda oportunidad sin precedente,
sinembargo e tendencianan actual ta indica cu e area digital ta
ampliando y cu e muhernan ta insuficientemente representa den e
camponan di ciencia, tecnologia, ingeniería, matematica y diseño.
Esaki ta impidi nan pa desaroya y influi den e desaroyo di inovacion
sensibel na genero, cu ta permiti nan logra e beneficionan trans-
forma pa sociedad.
Ta vital cu e idea y e experiencianan di hende muher influi igual den
diseño y aplicacion di inovacion cu ta forma e sociedadnan di fu-
turo,” Sue Ann Ras a finalisa bisando.