Page 70 - MIN VOS

Minister y candidato di partido AVP Alex Schwengle a
celebra su fecha natal tur cu tin

Monday, 24 April 2017 18:04
Comparti

Diadomingo atardi y anochi un biaha mas simpatizantenan di Partido di Pueblo Arubano AVP a sa di
yega e caya dilanti di residencia di mayornan di dokter Alex Schwengle na Savaneta. Famia, amigo y
simpatizantenan di Minister di Salud Publico a bini hunto pa celebra su cumpleaños.

Lider di partido Mike Eman a hiba palabra y a felicita su colega y amigo, pero tambe a resalta e
calidadnan di e candidato cu ta bay conoce su di dos campaña electoral. Eman a recorda con cuater aña
pasa e tabata para den e mesun cura di cas di mayornan di Minister Schwengle pa e tempo ey introduci'e
como candidato riba e lista berde y pidi e confiansa di pueblo di Savaneta y Aruba. Cuater aña despues
“Nos ta sumamente orguyoso y gradici cu Dios ta dune mas aña di bida pa sirbi e pais aki,” lider di
partido a bisa e publico. Eman a gradici tambe su famia pa e sacrificio cu nan ta haci dia aden y dia afo cu
comprension pa e exigencianan pisa di e trabou di dokter Schwengle. Mescos a yama danki na su
mayornan pa e bon formacion cu a dun’e como yiu, ciudadano y profesional. “Ora cu bo ta tuma e
decision pa bay atras den entrada pa asina sirbi bo pueblo, esey kier men cu bo curason ta na e luga
corecto; pesey bo ta AVP, pesey bo ta mi amigo y pesey mi tin confiansa den bo,” Eman a expresa cu hopi
entusiasmo. “Dokter Schwengle a haci un bon trabou y a pone Aruba na prome luga.” E celebracion a
conta cu un publico grandi cu a disfruta di e presentacionnan di e banda musical Perfect Sound y musica
di Mariachi. Tambe e a goza di e repertorio bailabel di Tsunami despues di a canta Happy Birthday, corta
y come bolo cu tur presente.