Page 71 - MIN VOS

Prome Minister Mike Eman ta reconoce deportista y
ciudadano ehemplar Ale Aparicio

Monday, 24 April 2017 19:48
Comparti

Diasabra anochi, bou di e luznan fuerte di stadion Guillermo Prospero Trinidad y net prome cu e wega di
Division di Honor di Aruba Voetbal Bond, tur esnan presente a tuma un par di minuut pa rindi
homenahe na e hungador Ale Aparicio.

E reconocemento aki tabata lidera pa su team RCA hunto cu Prome Minister Mike Eman kende a elogia e
ciudadano pa su pasion pa deporte y compromiso cu comunidad. Premier Eman a mustra comprension
pa e situacion caminda un hende tin tanto aña trahando cu tanto amor y dedicacion na un deporte, cu ta
yega e momento cu bo ta bisa: ‘Mi ta bay stop.’ Den e caso di Ale Aparicio ta papia di nada menos cu 22
aña den e organisacion RCA di Solito. “Cu miras pa futuro riba otro tipo di tereno y cu sentimentonan
mixto awenochi, pero mi ta sigur cu e respet cu bo a cosecha durante añanan y e admiracion cu tin na
Aruba pa e forma con bo a hiba e deporte,” ta balornan cu segun Prome Minister Mike Eman, lo keda pa
semper. Den nomber di pais Aruba y den presencia di sr. Aparicio su señora y yiunan, Minister President
Eman a pega un pin di bandera di Aruba riba su camiseta. Un acto modesto pero cu hopi simbolismo pa
ora cu e ta leu di nos isla, e keda corda riba e pueblo cu ta admir’e y aprecia loke el a haci pa deporte
local. Masha pabien na Sr. Aparicio y hopi suerte den futuro di parti di Gobierno di Aruba.