Page 14 - ATA

A.T.A. ta yama danki na Miriam Van Der Biezen cu tambe ta
contribui Na un aruba mas dushi

Thursday, 15 December 2016 19:13
Comparti

Aruba Tourism Authority a lansa e campaña ‘Danki Aruba’ den e espirito di fin di aña. Pa medio di e
campaña aki ta reconoce heroenan cu ta haci di Aruba uno dushi pa biba y como tal uno dushi pa bishita.
E cuidadano ehemplar cu ta wordo reconoci ta Miriam van der Biezen, un persona cu semper ta dedica
su tempo liber na duna extra ayudo gratis na muchanan cu tin e necesidad.

Miriam, mihor conoci como Juf Miriam, ta un persona cu ta enfoca ariba e importancia di educacion den
e parti di norma y balor como tambe desaroyo general. Juf Miriam ta contribui na e comunidad den e
forma di yuda mucha; “pa asina nan por crece bira personanan cu por expresa nan mes debidamente,
traha responsabel y carga e dushi isla Aruba pa hib’e padilanti”. Juf Miriam ta gusta traha cu mucha paso
muchanan ta caweta pa siña y ta pesei e ta dedica su mes na guia muchanan den educacion. Na e manera
aki Juf Miriam ta dedica su mes na trabou boluntario dunando guia y sosten den educacion na su
muchanan y ta sostene e futuro di Aruba. Juf Miriam ta e cabesante suplente na Scol Paso Pa Futuro y e
ta specialisa den educacion special di e categoria 6 pa 12 aña. Scol Paso Pa Futuro (SPPF) a lanta na aña
2004 como un scol special cu 35 mucha y awo a crese na 159 alumno. Juf Miriam su trabou ta pa duna
guia pedagogico na alumno, maestra y mayornan. Tambe e ta wordo encarga pa organisa actividadnan,
lezing y charla pa educa e alumnonan y mayornan. Su mensahe pa e comunidad ta pa cada mayor purba
educa nan yuinan e miho manera posibel pa asina nan por respeta norma y balornan di bida y pone
prioridad den educacion pa mayan nan por ta para bon den nan sapato. Ta danki na esfuerso boluntario
asina riba nos isla, e persistencia y bon boluntad nos isla ta sobresali.

E factor principal di nos turismo ta nos hendenan, nos mes, y pesei A.T.A. kier presenta un mensahe di
refleccion e aña aki pa medio di ‘Danki Aruba’. Cuminsando cu yamando danki na personanan ehemplar
manera Miriam van der Biezen. Danki Miriam. Semper cu un sonrisa Miriam a comparti y duna otro un
humilde man, dunando su aporte aña den y aña afo. Esakinan ta sigur caracteristicanan cu mester pa no
solamente nos turismo desaroya na un manera duradero y saludabel, pero pa simplemente nos
comunidad por biba na un manera felis, den harmonia cu otro. Subi online ariba www.dankiaruba.com
pa nomina bo heroe y sigui e campaña di ‘Danki Aruba’ ariba e pagina di Facebook y Instagram di
Oficina di Turismo Aruba. Den nomber di Aruba Tourism Authority nos kier gradici cada un di nos
hendenan pa nan lucha incansabel durante 2016 y kier desea nos comunidad feliz dianan di fiesta y un
One Happy 2017.