Page 6 - KPA 23 MARCH, 2017

Alan Howell finalmente a scoge pa sigui cu POR

Thursday, 23 March 2017 13:11
Comparti

Desde algun luna caba Alan Howell a demostra su malcontento den partido AVP, pasobra a logra mas cu
400 voto den eleccion 2013 y no a cumpli cu su lista di exigencianan.

No obstante cu a haci'e consehero di Minister Mike de Meza, toch e lo tabata kier un funcion mas
prominente, aunke ta su prome salida den politica. Awe el a anuncia cu e ta retira di AVP y como
consehero di Minister de Meza y ta uni cu partido POR. For di mainta caba Partido POR a cuminsa
promove cu pa 11:00am lo anuncia un candidato prominente di AVP cu lo anuncia su union na partido
POR. Di berdad pa 11:00am no a tuma luga un conferencia di prensa, manera a spera, sino un entrevista
di Alan Howell cu Power FM y Power TV (Liga na Otmar Oduber) dilanti Bestuurskantoor. Alan Howell a
duna di conoce awe cu 4 aña pasa el a logra hopi voto, aunke leu di saca su mes, pero toch el a haya cu e
mester a drenta Parlamento. E ta compronde cu ley ta prescribi cu number ta bay prome cu voto y e
tabata number 27, pues no a logra drenta. Pero su votadonan a bise cu e biaha aki no por ta mesun cos.
Como cu e no ta sinti cu AVP ta cla pa dune su balor y e number necesario pa garantisa cu e lo ta den
Parlamento of Conseho di Minister despues di e eleccion aki, el a opta pa bandona AVP.

E berdad ta cu Howell ta hopi interesa den asumi poder. Algun luna pasa a lobby cu partido MEP, pa fula
tera. Hasta un top di e partido, Glenbert Croes, a bishit'e na su cas na San Nicolas unda a delibera cune
pero no a logra yega un consensus of garantia pa number of posicion. Ayeranochi el a papia largo cu Mike
de Meza, unda el a splik'e su posicion y cu e ta retira como su coordinador y como candidato di AVP y cu
e ta sigui cu POR. Kico a sali di e reunion e no a menciona. Siendo un Polis, Alan Howell ta sigura cu e sa
hopi di caya, di husticia, di deporte y di asuntonan social, cu ta temanan cu e lo duna importancia awor
cu e partido nobo POR. Si e lo bolbe Cuerpo Policial awor no ta conoci ainda. Otmar Oduber, Andin
Bikker, Serge Mansur y Stephen Daal a funda partido POR algun luna pasa, cla pa participa den e
siguiente eleccion Parlamentario na Aruba, dia 22 d september proximo.