Page 70 - MIN SJA

Trahadonan di SERLIMAR kier sa si Gobierno ta bay cobra
pa e sushi di cas cu ta bay Ecotech

Monday, 05 December 2016 21:13
Comparti

Trahadonan di SERLIMAR dialuna mainta tempran a blokea entrada di Bestuurskantoor pa expresa nan
preocupacion di por perde na trabou, cu cierre di dump na Parkietenbos.
Presidente di e sindicato SEPPA, Magaly Brito, tabatin un encuentro cu Gobierno den oranan di atardi pa
haya aclaracion riba e situacion aki.
Na salida e sindicalista a combersa cu prensa y a bisa cu nan a pasa den no solamente un dia largo, pero
discusionnan basta largo tambe, den un reunion cu a cuminsa prome cu merdia y a finalisa rond di 4’or
di atardi. A cuminsa pa splica preocupacion di e trahadonan cu ta mira cu informacionnan ta sali den
prensa mientras cu nan mes no tabata na altura di kico ta bay pasa. “Tur esaki a trece hopi confusion
cerca e trahadonan.” Y mas ainda, e sindicalista ta bisa, ora cu ta papia cu dia prome di januari awor ta
sera dump. Pero den e reunion a bini dilanti cu esaki lo tuma luga den luna di januari, pero e dia exacto
no ta conoci. Esey ta di menos importancia pa e trahadonan cu ta mas preocupa cu nan cupo di trabou,
siguridad di nan trabou,y ki garantia cu despues di januari nan tin un entrada. “E discusionnan aki nos a
hiba cu diferente Minister awe. Na final nos no a yega na completamente na un acuerdo, pero loke si
Gobierno a haci di su banda ta cu el a dirigi un carta na trahadonan y SEPPA dunando garantia cu na lo
percura cu e salario di trahadonan lo keda cubri. Si tin descrepancia den administracion di pago pa cu
SERLIMAR, nan lo sinta hunto cu Directie pa yega na un solucion riba e pagonan.”
Gobierno a bisa cu e plan di cierre di dump no ta completo ainda, pasobra hopi di e puntonan di SEPPA
nan no por a contesta, segun Brito. Pesey nan no ta compronde di con Gobierno ta insisti pa den luna di
januari cera dump, of baha e actividadnan na Parkietenbos. SEPPA ta haya cu lo tabata miho nan keda
cla cu e analisis y bini cu claridad cerca e trahadonan. A palabra cu ora e analisis ta cla, lo sinta bek cu
SEPPA pa presenta e plan y discuti opcionnan pa cu e dump, e riesgonan y solucion pa saneamento di
dump teniendo cuenta cu bienestar di e trahadonan.
Tambe a keda palabra cu lo ratifica e decisionnan tuma den un reunion di Conseho di Minister y pa cu
continuacion di e servicio di SERLIMAR. Gobierno a bisa cu ningun momento lo bende e servicio of parti
di dump na otro compania.
E sushinan cu aworaki ta bay Parkietenbos ta bay wordo manda pa un otro compania cu lo procesa aki. E
trahadonan ta pidi pa esaki no tuma luga. E compania, Brito a splica, ta paga SERLIMAR pa e sushi aki
cu ta un entrada basta bon pa SERLIMAR. Pesey cu cambio e empleadonan ta preocupa cu ora esaki no
tuma luga mas, nan compania no tin e entrada ey mas. Pesey nan kier pa Gobierno sigura cu unda cu e
sushi ta bay e compania ta paga Gobierno su empresa pa esaki. E motibo ta cu e empresa cu ta bay
procesa e sushi ta sigui uza e material pa haci otro tipo di negoshi y saca ganashi. Gobierno di su banda a
informa SEPPA nan no ta cla cu e analisis di dump ainda pa compromete nan mes di cumpli cu e peticion
di e empleadonan.
SEPPA ta kere cu Gobierno ta subestima e cantidad di sushi cu ta yega diariamente na Dump y nan ta
duda cu un compania priva lo por atende di forma completo cu esaki. Pesey nan ta kere cu Parkietenbos y
su dump pa basta tempo lo keda opera normal. Solamente nan kier sa si un parti di servicio di
SERLIMAR lo wordo bendi, cu nan ta considera cu ta bende un patrimonio di pueblo.
SEPPA lo reuni diamars mainta un biaha mas cu e empleadonan.