Page 14 - MIN VOS

Inspeccion di Salud Aruba (IVA) a conclui su prome rapport
Siguridad di remedi ta un prioridad pa e pashent

Thursday, 01 June 2017 09:36
Comparti

Dialuna dia 29 di mei 2017, Inspeccion di Salud Aruba (IVA) a presenta e resultadonan y a haci entrega
di e rapport di e prome sondeo tocante siguridad di remedi na e partnernan cu a participa na e sondeo
aki cu ta: HAVA (e Asociacion di Dokternan di Cas di Aruba) y VAA (e Asociacion di Boticarionan di
Aruba).

Na e presentacion aki, AZV y Minister di Salud Publico, Cuido di Nos Grandinan y Deporte, dr. Carlos
Alex Schwengle tambe tabata presente. E sondeo tocante siguridad di remedi a tuma luga den e periodo
di januari 2017 te cu fin di april 2017 cu e meta pa haya un bista amplio riba e proceso di prescripcion y
entregamento di remedi na pashent. E enfasis tabata riba e siguridad di e proceso aki, pues con
cuidadoso esaki ta wordo haci. Durante e sondeo IVA a bishita 14 dokter di cas y 4 botica. Tambe tabata
tin dos encuentro cu varios dokter di cas cu no a forma parti di e 14 dokternan di cas cu a haya un bishita.
Esaki a wordo haci pa asina haya un bista mas representativo di e dokternan di cas aki na Aruba. Cu e
informacion colecta durante e sondeo, IVA a duna recomendacionnan pa minimalisa problemanan relata
na siguridad di remedi. Asina por evita cu por ehempel, un pashent ricibi un remedi robes of evita cu e
pashent ricibi un dosis robes pa motibo cu e botica a comete un fayo of pa motibo cu e dokter di cas a
prescribi un dosis robes. A base di e recomendacionnan duna, lo traha un plan di ehucucion unda IVA
por monitoria e progreso di e recomendacionnan.

IVA a wordo estableci cu e meta pa monitoria, stimula y mehora calidad di cuido na Aruba. E topico di
siguridad di remedi ta un di e seis topiconan clave cu IVA lo enfoca riba dj’e den e añanan venidero. E
topico aki a haya prioridad pa motibo cu e ta un topico cu ta di importancia pa e diferente dunadonan di
cuido den e prome liña di cuido (p.e. dokter di cas, botica) y esunnan den e di dos liña di cuido (p.e.
specialista). Pues, haci un sondeo riba siguridad di remedi ta un beneficio grandi pa e pashent como
tambe e diferente partnernan den cuido. Ademas, preparacion y prescripcionnan corecto di remedi ta
importante pa e pashent y pa e calidad y seguridad di cuido medico en general. Den e simannan venidero
IVA lo duna informacion mas amplio tocante e resultadonan di e sondeo y tambe recomendacionnan cu a
wordo duna na e diferente partnernan.