Page 35 - MIN ARENDS 13 APRIL 2017

Director di Post Aruba NV Guillermo Raymond: "Nos ta haya
masha hopi pakete mes, on-line shopping ta algo hopi

grandi"

Wednesday, 12 April 2017 20:00
Comparti

Despues di e bishita oficial di Minister di Asuntonan Economico y Comunicacion Richard Arends na Post Aruba NV
y e recorido den e edificio pa saluda e empleadonan y tende con e trabou ta anda eyden, Minister Arends a reuni cu
director di e compania estatal Guillermo Raymond y su staff.

Varios idea y topico a wordo discuti entre otro con amplia e servicionan di Post, pero tambe con percura pa e
transicion di e post convencional pa un post enfoca riba e-commerce sosode di e miho forma posibel.
Director Raymond a bisa cu e reunion cu Minister Arends a bay hopi bon. "Minister ta hopi interesa den e
desaroyonan di Post Aruba NV. E kier a tende di e siguiente desaroyonan cu ta bay bin y tambe e tabata masha
interesa pa sa con ta bay cu e trahadonan." Raymond a bisa cu a cambio di e negoshi di post no ta haci e compania
bira obsoleto. Esaki pasobra nan ta mas envolvi awor den distribucion di paketenan. "E-commerce rond mundo ta
desaroyando hopi positivo. Post Aruba NV ta hayando asina hopi pakete cu te hasta mester a construi un lugar pa
por store tur e paketenan aki. E paketenan aki ta bin di tur parti di mundo. Mas tanto di China, pero tambe hopi di
Indonesia, Merca y otro paisnan. On-line shopping ta algo hopi grandi."
Director Raymond a splica cu e cooperacion cu Douane ta hopi bon. "Nos a haya un X-ray machin cu ta bay speed up
e proceso di inspecciona e paketenan. Den pasado nos tabatin hopi problema den entrega di paketenan, pero awor cu
e machin a yega e proceso aki ta bay ta mas lihe. Normalmente Douane mester habri e pakete y check e contenido pa
dicidi e invoerrechten cu mester paga. Awor esaki ta wordo controla pa e X-ray machin y asina e proceso ta bay mas
lihe y den forma mas eficiente."