Page 31 - ATA

E carera den hospitalidad di sr. Biemans, kende a nace na Austria, a cuminsa cu Hilton y
Intercontinental na Sur America prome cu el a obtene su bachelor den International
Business na Florida State University.

Na comienso di añanan 70, sr. Biemans a muda pa Aruba unda el a maneha The Coral
Strand Hotel cu despues lo bira Talk of the Town. Su siguiente funcion tabata co-
propiertario y manager di Manchebo Beach Resort prome cu el a cuminsa e desaroyonan
y su reto nobo como propietario di Bucuti and Tara Beach Resort.

Sr. Biemans no ta solamente envolucra den e industria turistico, pero tambe ta lidera
diferente proyecto den nos comunidad, encurashando otro hotelnan local pa tuma
iniciativa pa proteha Aruba su recursonan natural.

Sirbiendo e hunta di AHATA ya pa hopi añas, su contribucionnan a inclui e funcion di
Presidente di AHATA, fundador di Aruba’s SKAL Club chapter, creador y Presidente di
Comision Ambiental di AHATA como tambe Director di e hunta di Parke Nacional
Arikok.

Como lider den e industria di turismo ecologico, Bucuti and Tara Beach Resorts a logra
obtene e mayoria di certificado ecologico den Caribe, cual ta rekeri un proceso di
renobacion anual di recertificacion rigoroso.

Pues obtene e Green Globe Platinum pa World’s Most Sustainable Hotel y e Certified
CarbonNeutral como e prome hotel certifica pa CarbonNeutral ta un logro berdad, pero
pa mantene e posicion aki tambe ta un reto riba su mes.

Sr. Biemans kende ta un orador masha cudisha pa loke ta trata ecoturismo, a wordo honra
local y internacionalmente pa su trabou di preservacion ambiental. El a gana permionan
manera Green Hotelier of the Year na 2014, Leader in Sustainability na 2016, como
tambe e World Travel & Tourism Climate Action Award na 2019.

No ta niun sorpresa cu sr. Ewald Biemans su Bucuti & Tara Resort ta coleccionando un
multitud di reconocemento y premio: Travel & Leisure World’s Best List 2018, USA
Todays’ 10Best in the Caribbean 2019, Tripadvisor Traveler’s Choice Awards 2019.