Page 36 - ATA

Ta inaugura Christmas Village pa e temporada di fiesta

Tuesday, 29 November 2016 17:06
Comparti

"Nos ta masha orguyoso di anuncia e donacion aki, un berdadero regalo pa e temporada aki di fin di aña
pa henter comunidad, specialmente pa San Nicolas", asina Francie Solognier-Croes di Refineria di Aruba
a anuncia durante un conferencia di prensa pa anuncia "Christmas Village 2016".

John Hassell, organisado di Carubbean Festival a enfatisa cu lo combina esfuerso pa hunto celebra e
temporada aki di fin di aña. Lo probecha pa organisa e ultimo Carubbean Festival diahuebs awor dia 1 di
december hunto cu apertura di Christmas Village. Lo muda e evento for di caya grandi di San Nicolas pa
Carnival Village cuminsando for di 6:30pm pa 10:30pm cu 4 grupo di gaita, entretenimento, bar y
cushina bon surti y acerca lo tin un schaatsbaan pa e muchanan. Separa di entretenimento, lo decora e
luga den ambiente navideño, incluyendo hopi decoracion di luz, musica di Pasco y sin lubida un
kertsboom di mas cu 20 pia di haltura. E temporada lo inicia diahuebs dia 1 di december y lo sigui te dia
6 di januari 2017. Teniendo cuenta cu dianan di fiesta, lo no tin evento riba dianan 24, 25, 26, 30 y 31 di
december 2016 y 1 di januari 2017 tambe lo ta cera. Probechando cu scol ta cera dia 15 di december, lo
organisa un competencia entre studiantenan riba dianan 16, 17 y 18 di december. Lo dedica e weekend na
hubentud.

E scol ganado lo gana un premio efectivo cuantioso. Scolnan secundario na San Nicolas, esta MAVO y
HAVO, klasnan 1-2 y 3-4 lo competi den baile, canto y obra teatral. Fuera di esey, e organisadonan lo
organisa competencia di gaita y cantamento di coro. Pa participa por tuma contacto cu e comishon
organisado di Carubbean Festival. E aña aki, e temporada di fin di aña nos lo celebr'e y bib'e na San
Nicolas, den hopi ambiente di Pasco, e tradicion di union familiar, come cuminsa di Pasco, muchanan
por schaats y asina hunto pasa dianan di celebracion.