Page 16 - UTILITIES

Habitantenan contento a

celebra yegada di luz

den Flamboyanstraat

Published on November 29, 2016 in Local
ORANJESTAD, Aruba

Despues di un oracion habitantenan di Flamboyanstraat a mira con luz a wordo cendi
den nan caya pa prome biaha diahuebs anochi, door di Prome Minister Mike Eman y
Minister di Utilidad Mike de Meza. Gabinete Mike Eman I y II tin e pensamento cu cada
caya na Aruba unda a construi cas mester tin iluminacion pa e habitantenan por sinti
nan sigur y cana trankil den oranan di anochi den e bisindario. Pa e motibo aki ya na
2009 a traha riba un plan pa trece iluminacion den tur skina di Aruba, manera ta deseo
di pueblo.

E hecho cu Gobierno a cuminsa pone iluminacion den e bario di Flamboyanstraat,
tabata motibo di hopi alegria cu habitantenan a celebra cu un oracion y un momento
social despues di e inauguracion di e prome poste di luz. “E oracion tabata pa motibo
cu pa e bario esaki ta wordo mira como un momento cu nan ta uni bou di un ambiente
di speransa y sentido di triunfo pa algo cu nan a desea pa hopi aña y cu awe nochi a
keda realisa,” Prome Minister Eman a expresa. El a agrega cu pa hopi kisas, e luz ta
wordo mira como algo tecnico pero pa e habitantenan e iluminacion ta crea conexion
entre habitantenan, entre mayornan cu nan yiunan cu ta hunga pafo ora cu ta scur.

Pa Gobierno, Prome Minister Eman a bisa, cu ta ehecutando e proyecto di Luz den
Bario ta importante pa duna otro piesa pa yuda mehora calidad di bida di ciudadanonan
den bario. Esaki ta haci tambe cu ciudadanonan ta haya confiansa adicional den
direccion di pais Aruba y su gobernacion. Nan ta mira cu un deseo cu nan tabatin a
wordo cumpli y cu nan bos ta wordo scucha. “Pa nos e ta un momento placentero pa ta
aki den Flamboyanstraat pa celebra un hecho importante pa esnan cu continuamente a
lucha pa e iluminacion aki yega cerca nan.”

Prome Minister Mike Eman a bisa cu continuamente ora cu pone potretnan riba su
Facebook di unda nan a yega cu e programa di “Luz den Bario” mesora e ta haya
reaccion di ciudadanonan cu ta pidi pa e luznan moderno (LED Light) wordo poni den
nan caya tambe. Di e forma aki e mandatario ta pasa e nombernan pa pone riba e lista
di registracion oficial cu tin na ELMAR. Otronan ta aserca e Ministernan via FB. Hecho
ta cu e canalnan mas moderno, e rednan social, ta e forma con mas lihe e peticionnan
ta yega cerca e mandatarionan, entre otro via nan Facebooknan.