Page 31 - AVP

Fuera di esaki Sevinger tambe tin contra dje casonan di tereno durante e periodo cu e
tabata Minister di Infrastructura pa Gabinete Mike Eman I y II, segun Presidente y
Parlamentario di MEP, Hendrik Tevreden..

NO TA PERSECUCION POLITICO
Den e casonan asina aki, cu ya caba a mira hopi na Corsou, Sint Maarten y tambe na
Aruba mes (IBIS) semper un comision imparcial di husticia ta wordo apunta pa valida tur
informacion prome cu e investigacion mes cuminsa.

Basa riba nan trabou den forma independiente, e decision ta wordo tuma cu si tin un base
legal pa por cuminsa investiga. Esaki ta hustifica cu den casonan di e embergaduranan
aki, no tin espacio pa persecucion politico. Mas ainda den caso ‘Avestruz’ ta R.S.T. y
otro funcionarionan Hulandes ta encarga cu e investigacion, hunto cu Cuerpo Policial y
Landsrecherche.

Similar na caso IBIS unda cu Hulanda tambe tabata envolucra. Esaki atrobe ta mustra
riba e hecho cu e casonan aki ta cana diligentemente y no tin ningun involucracion
politico den nan.

ENTREGA ASIENTO
“A yega ora pa Parlamentarionan di AVP entrega nan asiento. Nos no kier pa ripiti,
manera paisnan den Reino y hasta na Aruba mes, unda cu funcionario of
Parlamentarionan lo bay prison, mientras ainda nan ta den funcion. Pueblo ta hayando e
confiansa atrobe cu esnan cu ta wordo scogi pa asumi e posicionnan aki, ta haci nan
trabou cu tur seriedad y manteniendo tur principio.

E mancha di pasado, nos ta trahando duro tur dia pa logra na kit’e. Y bandonando
Parlamento pa e atende su caso penal, los di Parlamento, t’e mihor cos cu Sevinger lo por
haci p’e instituto”, Hendrik Tevreden a remarca.