Page 51 - MIN ON

Kiziah Arends: Na e evento aki nos opinion ta wordo scucha y
ta haci algo cu ne

Tuesday, 09 May 2017 20:24
Comparti

E hoben dinamico Kiziah Arends, kende ta un 'young voter' tabata un di e cantidad di participantenan
na e evento exitoso 1000voz cu a tuma lugar diadomingo ultimo den Hilton Hotel.

Kiziah ta conta cu el a haya un invitacion di algun amigo di dje pa bin participa y duna su opinion
durante 1000voz. "Mi ta un votado nobo y aki mi a haya oportunidad di por expresa mi
preocupacionnan y trece ideanan innovativo dilanti".

Kiziah a splica cu el a sinta na e mesa unda a discuti riba economia di Aruba. E pregunta cardinal cu a
bin dilanti ta kico por haci pa mehora economia di Aruba. "E preocupacion tabata riba maneho di
belasting. Pakico e ta un problema y kico por haci pa soluciona e problema aki. " Kiziah a bisa cu el a
haya e evento masha importante pa cada un di nos cu ta biba aki. Hopi bes nos como Arubiano tin nos
opinion y kier mira nos opinion wordo tuma na serio. Un evento manera esaki , unda tur hende ta
participa activamente, ta haci cu sigur nos opinion ta wordo scucha y cu ta haci algo cu ne."
Kiziah a sigui conta cu e punto mas positivo cu e ta mira cu a tuma lugar na Aruba durante e ultimo
añanan ta mehoracion di caya grandi. "Pa hopi aña caya grandi tabata morto. Tur hende a señala e
problema, pero ningun a tuma e tempo pa haci algo cu ne. E gobierno aki a renoba caya grandi, a haci'e
bunita, a duna incentivo na esnan cu ta habri un tienda den caya grandi. Ultimo aki a hasta kita klem.
Asina ta cu por ta mira cu constantemente gobierno ta purba di yuda comercio. Tin movecion awor y
ora tin un problema esaki ta wordo atendi. Mi ta spera cu gobierno sigui cu e trabou te na e punto unda
caya grandi tin cu yega unda e tin cu yega."

Kiziah ta haya cu partido AVP tin oido pa pueblo. "Claro cu tin diferente hende cu diferente opinion ta
biba aki. Semper ta dificil pa complace tur hende. Pero scuchando hopi hende y tende nan opinion ta
trata di e forma aki yuda tur hende."