Page 66 - MIN JUS

Rudy Croes: Si B'a comete algo contra ley, Bo mester sinta
riba Bo blaarnan

Sunday, 23 April 2017 10:47
Comparti

Ex Minister di Husticia Rudy Croes, alabes omo di tanto Paul Croes como Gilbert Croes a sali ayera enfrenta e
acusacionnan y di cual e ta subraya su posicion den ambos caso. Di un banda cu un postura fuerte, di esun cu faya ta
haya, mientras di otro banda e ta pidi pordon, si resulta cu e acusacionnan ta berdad.

Su comentario ta un poco diferente cu di partido MEP, cu ta pidiendo investigacion y retiro inmediato di Paul Croes
como mandatario, hasta prome cu e investigacion termina.

"Ultimamente , m'a haya confronta cu poco noticia desagradabel , unda un sobrino Ministro ta haya su mes ta bira
sospechoso den un caso serio di duna exoneracion na gran cantidad di personanan cu asina ta yega na permiso SIN
cu mester pasa departamento di Labor , pa wak si tin hende local disponibel pa haci e trabaonan ey. Ayera un biaha
mas mi ta keda sorprendi pa un otro noticia desagradabel cu otro sobrino ta haya su mes ta bira sospechoso di caso
di atraco tambe lo a haya otro artefactonan prohibi na su cas", asina e ex mandatario a skirbi riba su pagina di
Facebook diasabra atardi.

"Mi mes NO por bisa mucho cos riba e dos casonan aki , pasobra mi NO tin conocemento di contenido di nan. Como
ministro y como RUDY semper m'a bisa si: cu bo por ta mi yui , ruman, omo, sobrino, mi tata, mi mama y ken cu ta,
si bo comete algo contra ley Bo mester sinta riba bo blaarnan! Tambe m'a bisa semper: si bo ta labado di placa cu ta
bin di droga y si bo ta trafica den droga pa bo enrikese bo mes riba sufrimento di otronan, bo NO ta mi amigo y mi
NO kier bo voto tampoco!!! Pa esunnan cu ta victima di sociedad cu ta e UZADORNAN di droga , mester busca
curacion pa esaki!", asina Rudy Croes a opina.

Na final, e ex Minister di Husticia y alabes omo di ambos sospechoso a skirbi "Mi ta admiti tambe cu mi ta stima mi
famia completo y p'esey, si resulta cu ta berdad e acusacionnan contra mi dos sobrinonan aki, anto mi ta reza na
Papa Dios, pa pordona nan, mescos cu mi ta reza na Papa Dios pa tur otro pecador y no pecador", Rudy Croes a
finalisa bisando.