Page 92 - KPA

Evelyn Wever-Croes (MEP): Minister Dowers Ta E

Minister Cu A Haya Mas Mocion Di Desconfiansa

 Featured

 Politica
- 11/04/2017

Oposicion COMPLETO den Parlamento a entrega mocion di desconfiansa contra
Minister Arthur Dowers. Cu esaki Minister Dowers ta bira e Minister cu mas mocion di
desconfiansa den historia di pais Aruba, segun Evelyn Wever-Croes.

Ademas, ta prome biaha desde 2009 cu 9 miembro di Parlamento ta firma e mocion di
desconfiansa. E mocion aki ta den e relacion cu e ola di criminalidad y insiguridad cu ta
sigui asota nos comunidad y cu a tuma dimencionnan sumamente preocupante y
inaceptabel, el a remarca.

E maneho di e Minister actual no ta funcionando pa brinda solucion efectivo pa trece bek
siguridad y trankilidad den nos comunidad. Lamentablemente e Minister cada bes ta cay
den ripiticion den defensa di su maneho deficiente, pues no tin bista riba mehoracion
concreto, lider di MEP ta agrega.

A base di esaki oposicion COMPLETO a entrega un mocion di desconfiansa contra e
Minister di Husticia. E mocion a wordo rechasa cu 11 votos na fabor di Minister
Dowers y 9 votos contra Minister Dowers. Ta prome biaha cu el a haya un votacion asina
cerca di un decision di confiansa, Evelyn Wever-Croes a duna di conoce.