Page 9 - KPA

Noticianan di polis pa 31 di Maart 2017

Tuesday, 04 April 2017 12:08
Comparti

Aki ta sigui un resumen di noticianan di polis pa dia 31 di Maart, 2017.

Homber ta wordo atraca banda di stacion di bus den Wilhelminastraat

ORANJESTAD - E homber L., a presenta na warda y a conta polis cu el a wordo atraca cerca di e stacion di bus den
Wilhelminastraat. E no tabata desea di haci denuncia pasobra ta solamente 80 florin a wordo horta. El a declara cu
un hende riba un bicicleta a haci esaki. E no conoce. Tur loke e tabata kier ta bay na cas cerca su famia. Polis a yama
su famia, pero ningun hende no por a bin busk’e, mirando cu nan ta hendenan di edad cu no ta core auto anochi. El a
wordo baha na cas door di polis.

Situacion sospechoso na La Ronda

ORANJESTAD - Diabierna, pa mas of menos 4’or y 20 di marduga, central ta manda patruya na La Ronda, pa un
situacion sospechoso. Segun e melding e sospechoso lo mester ta na e sitio ainda. Eynan, a topa cu e doño y patruya
di Smart System. E doño a conta cu por medio di su telefon, el a mira imagennan di video cu dos homber tabata
purba di habri e porta patras di su negoshi. Ora cu nan a yega na e sitio, ya nan no tabata tey mas. E dos hombernan
aki no a logra drenta den e luga. Central a wordo poni na altura.

Kitesurfer a perde un rato riba lama

MALMOK - Central ta dirigi patruya cu urgencia na Fishermans Hut, caminda cu un kitesurfer pa mas of menos 45
minuut lo tabata perdi. Parce cu e doño di e watersport tabata bezig ta busca e kitesurfer. Riba e indicacion aki, polis
a bay na e sitio. Eynan a wordo acerca pa miembronan di famia di e kitesurfer y tambe e doño di e watersport. El a
declara cu e homber ta a salbo y cu un catamaran a bin hay’e riba lama y a trece bek canto. Na e sitio, e homber D., a
declara cu e tabata bezig ta kite, ora cu dado momento cu un biento fuerte a presenta y akinan el a perde control riba
e kite y a cuminsa drief. Door di e biento, el a bay mas leu. Durante cu e tabata bezig ta drief bay afo, un catamaran di
De Palm Tours a trece tera y na pia el a bay na e watersport. Durante cu e doño tabata busk’e, riba lama el a bin topa
cu e harnas di e homber D., caminda cu el a deduci cu e homber no tabata perdi mas. D. a declara cu e ta sinti su mes
bon y cu solamente e tabata un tiki spanta. Central a wordo poni na altura.