Page 25 - HOH

E persona tin cu acepta algo cu ta bay cambia henter su bida. “Bo mester ta mas serio
na dje, pasobra e ta un tratamento”, a remarca.

Den dialyze tin diferente tratamento. Tin tratamento na cas y tratamento riba afdeling.

E otro tratamento ta “niertransplantatie” (transplante). Hopi hende no kier acepta nan
problema. Tur cos ta cuminza den acepta cu esaki ta bay cambia bo bida. Ta tende hopi
cos. Cu hende ta fayece, cu no ta bon.

“E aceptacion ta cuminza cu bo mes. E ta un tratamento cu bo tin cu acepta cu bo
curpa y a lo largo bo lo ripara tambe cu e ta mehora e gevoel cu bo tin ora bo ta bezig
ta dialyza”, Bromet a subraya.

Na cuminzamento, toxinanan ta wordo saca for di e curpa. E pashent mester custumbra
cu e tratamento. E urina ta bira menos di locual un hende ta urina. Esaki ta pa motibo
cu e riñon no ta saca tur e toxinanan. Nan no ta bay mas door di e riñon, sino door di
un mashin cu ta haci bo sanger “saver”.

Eynan caba, hendenan ta sinta 3 pa 4 ora maximo na un stul pa haya nan dialyze.
Esaki ta tuma lugar 3 biaha pa siman. Tur cos ta depende di con e funcion di bo riñon
ta. Esey nan ta hacie via di un test di sanger, Nastasha Bromet a duna di conoce.

E condicion di e pashent tambe ta depende di si e ta sigui e instruccion di e docter, si e
ta presenta pa haya dialyze y di si e ta tumando su remedinan.

El a enfatiza cu ta hopi importante cu ora un persona ta hayando dialyze cu e no por
bebe mas cu 1 liter di likido den 24 ora. E persona tin limitacion di bebe likido. Esey no
tin di haber cu awa so. Por ta sopi, koffie, juice, etc. Tur cos cu ta likido.

Esaki ta un malesa cu no tin cura. Ta un tratamento, un proceso y tur cos ta keda na e
pashent pa tur cos bay segun tratamento ta prescribi, e experto a remarca.

https://www.diario.aw/2019/03/malesa-di-rinon-no-tin-cura-pero-ta-un-

proceso-di-aceptacion/