Page 9 - ATA

Sra. Arends-Reyes ta bisa cu un destinacion cu ta cay bou di e categoria “madura” mester
tene na cuenta varios factor cu ta influencia e competitividad. Factornan importante
manera infrastructura, impacto ambiental, maneho di destinacion y perdida di vitalidad
economico. Nos sa cu infrastructura di un pais y e percepcion di e turista riba esaki ta un
factor determinante na momento cu ta scoge pa un destinacion of no.

Tambe pa esnan cu lo brinda servicio tanto di aerolinea, crucero of tour operators e parti
di efectividad y infrastructura ta keda tambe determinante na momento cu ta scoge pa un
destinacion. Impacto ambiental tambe ta un factor cu mester keda enfoca hopi riba dj’e
pa Aruba no perde e harmonia entre desaroyo y autenticidad.

Den e parti di maneho di destinacion por bisa cu Aruba Tourism Authority a percura pa
desaroya su mes di un DMO (Destination Marketing Organization) pa un DMMO
(Destination Marketing and Management Organization). Esaki ta encera cu di Desination
Marketing awor nan ta enfoca como organisacion rib’e mercadeo y maneho y
coordinacion di Aruba como destinacion.

Y e ultimo factor cu tambe ta di suma importancia pa Aruba cu ta e perdida di vitalidad
economico ta keda calidad. Esaki netamente ta locual e representantenan di IMF a keda
pone enfasis riba dj’e calidad y balor di Aruba como destinacion mester keda hopi halto.

Sra. Arends-Reyes ta enfatisa cu Aruba no por permiti su mes pa prijsnan baha a costo di
atrae mas turista. Na momento cu atrae turistanan cu tin mas poder di compra y cu ta
menos sensitivo pa prijs e ta contribui na e sostenibilidad economico no solamente pa
Aruba pero pa henter e region.

Si nos tuma e cifranan di e dos prome lunanan di aña 2017 nan ta sumamente alentador y
ta duna un bon comienso pa 2017 su Turismo. Si nos tuma e cifranan preliminar di luna
di februari 2017 nos por a nota cu e ocupacion di cambernan a yega na 87.9% compara cu
83.5% di februari 2016. Un crecimento di 4.4%. Un otro aspecto importante ta e ADR, e
promedio di e prijs di camber pa dia a subi di $308.11 pa $ 315.71 pa februari 2017. E
combinacion di ocupacion mas halto di cambernan hunto cu un promedio di prijs di
camber pa dia mas halto a subi e REVPAR significativamente cu 7.8% compara cu e aña
anterior. E REVPAR a subi di $ 257.38 pa $277.53 na februari 2017.

Sra. Arends-Reyes ta conclui, bisando, “Den e cuadro di metanan pa nos isla y pa percura
pa nos tin un turismo stabil nos por bisa di ta sumamente orguyoso di tur e partnernan y
profesionalnan cu ta traha na beneficio di desaroyo di nos isla.”