Page 13 - MEDIA MONITORING - JULY 10, 2018

Diamars, 10 Juli 2018 AWEMainta 3
Tur documento ta cla
Falta solamente firma di Minister Chris Romero
y Teo Croes ta retira como Director di Arubus
E ta hayando un “golden handshake”
No ta awe, pero for di dia cu Gobierno nobo a tuma asiento, Teo Croes, Director di Arubus ta riba lista di “corta su cabez”. Pero no tabata facil pa retir’e sin mas, pa cual Minister di Transporte Publico a bin ta negocia cu su persona. Awor tur documentacion ta cla, no mas falta firma di Minister Romero, kende no por firma ainda, debi cu e ta den exterior.
Di acuerdo cu nos informacion, Teo Croes lo haya un “golden handshake”, pero banda di esaki Gobierno lo mantene pa por lo menos un aña den calidad di consehero di e mandatario pa por haci un transaccion responsabel p’e proximo Director di Arubus, maske cu lo institui prome un management team, pa despues bin cu un Director nobo.
No por a deshaci facil di Teo Croes, pasobra e ta conoci como un campañador di Otmar Oduber y e lider di POR no por permiti pa su propio Gobierno core cu un di su hendenan di e forma aki. Di acuerdo cu nos informacion, pesey prome cu a tuma e decision aki, a consulta cu Otmar Oduber, kende na su turno a consulta cu Teo Croes, kende mes no kier a sigui den e funcion, pero “cuanto hay por eso?” Y asina a bin cu un “golden handshake” pa Teo Croes por bay.
Atrobe tur esaki riba lomba di pueblo y ta bon pa sa cuanto e retiro aki a costa pueblo di berdad. Tempo lo bisa cuanto e ta(bata). Y no lubida cu Arubus lo tin cu paga salario di esnan cu lo forma parti di e management team.
Minister Andin Bikker a dicidi pa
Instala Wifi na tur Warda di Polis
Loke a wordo neglisha den era moderno aki
LOKE cu Minister di Husticia mr. Andin Bikker no por compronde ta dicon ningun Warda di Polis na Aruba no tin WiFi. Pesey ayera tardi, tabatin un ceremonia chiquito na Warda di Polis na Playa, unda a inaugural WiFi y asina ta su intencion pa institui WiFi na tur demas Wardanan di Polis na Aruba.
E mandatario no por compronde dicon nunca e ex-mandatario no a percura p’esaki, siendo un tool masha importante pa haci trabao policial. Na Warda di Polis di Shaba, hasta e Polisnan ta chip-in pa paga for di nan propio saco pa por tin WiFi. Pesey el a tuma decision pa inmediatamente provee tur Warda di Polis cu Wi-Fi. Pa re-activa p.e. camaranan di seguridad ultimo simannan, cu tin un prijs-kaartje di 30 pico florin pa 4 aña, y pa tur Warda di Polis, haya WiFi tin cu paga un suma insignificante. Pesey el a dicidi pa tur Warda di Polis lo haya Wi-Fi, igualmente Warda nos Costa y tambe Voogdijraad.
Di e forma aki, lo pone e Wardanan di Polis lo bira mas efectivo den nan trabao, segun Minister Andin Bikker.