Page 12 - MODUL B.SUNDA KELAS VIII SMP NUSANTARA

“Tempatna mah teu acan ditangtoskeun, margi teu acan aya kasapukan
kontrak sareng nu kagungan tempat. Tapi nu pasti mah di Bandung, “
ceuk Satria.

Dédé Yusuf boga harepan. Lian ti di Bandung, Musikal Lutung
Kasarung téh rarancangna mah rék dipagelarkeun ogé di É-Planét
Singapura. Lewih legana deui, di nagara-nagara liana, kayaning Malaysia
jeung Thailand.

“Sim kuring optimis, carita-carita rayat Jawa Barat bakal ditampi tur
diaprésiasi di luar negeri. Ku kituna, pintonan Lutung Kasarung téh bakal
digarap kalayan daria bari inovatif, “ ceuk Dédé Yusuf. *** Rosyid É. Abby.

Dicutat tina Galura Édisi IV, Juni 2011 Kaca 09

(Dicutan tina buku paket Simpay Basa Kelas VIII, kaca 20)

WARTA 2

FFB Ngeureuyeuh Ngajén Pilem

Unggal taun teu kungsi copong. Najan teu loba disorot ku média
televisi, tapi Forum Film Bandung (FFB) ngeureuyeuh ngajén pilem-pilem
anu diputer di bioskop-bioskop di kota Bandung, boh pilem nasional boh
pilem impor. Kitu deui sinétron anu diputer dina televisi nasional.

Béda jeung taun-taun saméméhna, pamasrahan pangajén kana
pilem jeung sinétron taun 2013 mah ti saméméhna kénéh geus ramé
dibéwarakeun, boh ngaliwatan média koran boh televisi. Kawuwuh
acarana gawé bareng jeung televisi swasta badag; SCTV. Acarana bakal
disiarkeun langsung ti Lapang Gasibu Bandung , poé Saptu tanggal 15
Juni 2013. Pilem jeung sinétron anu diajénna, anu diputer salila taun 2012.

Nurutkeun pupuhu FFB, H. Eddy D. Iskandar, pilem anu diajén salila
taun 2012 téh aya 92 judul pilem nasional jeung 140 judul pilem impor.
Sedeng sinétron anu diajén téh aya 335 judul. Tah tina jumlah anu sakitu
lobana téh, anu ditetepkeun jadi nominasi ngan 13 judul pilem nasional
jeung 12 judul pilem impor.

Tina jumlah nominasi anu sakitu téh bakal dipilih pilem anu pinuji.
Saur H. Eddy D. Iskandar, ngahaja cenah maké kecap pinuji lain kecap
pangalusna, lantaran anu dipilihna pilem atawa sinétron anu meunang
pamuji atawa anu pantes dipuji. Tangtu baé ieu pangajén téh meunang
pangbagéa jeung pangrojong anu kacida hadéna ti parainsan pilem
Indonesia. (dicutat jeung diropéa tina Majalah Mangle no: 2440)

(Dicutat tina buku SMP Kelas 8 Hal.28)

11