Page 50 - MIN.VOS 3 OCT,2015

54 AWEMainta Diasabra, 03 October 2015

Incidencia Global

Ta calcula pa 2015 cu casonan nobo
di Trastornonan Neurocognitivo (leve
y mayor) di e tipo Alzheimer lo subi
cada aña, mundialmente, cu 9.9
miyon; esaki kier men cu cada 3.2
seconde tin un caso nobo.
E estimacionan aki ta casi 30% mas
halto cu e cifranan anual di casonan
nobo cu a ser calcula pa 2010, manera
raporta door di Organisacion Mundial
di Salud (WHO) na aña 2012:
‘Dementia: a public health priority’
(Trastornonan Neurocognitivo, Un
Prioridad Den Salubridad Publico).
E casonan nobo di Trastornonan
Neurocognitivo aki ta wordo reparti
regionalmente di e siguiente forma: 4.9
miyon (esta 49% di e total di casonan) na Asia, 2.5 miyon (25%) na Europa, 1.7 miyon (18%) den
continente Mericano (di Canada te cu Sur America) y 0.8 miyon (8%) na Africa.
Si compara e distribucion aki cu esun reporta na aña 2012, por observa cu e cifranan actual ta
representa un crecemento di e cantidad proporcional di casonan nobo na Asia, continente Mericano y
Africano, mientras cu na Europa e cantidad proporcional a baha.
E incidencia di Trastornonan Neurocognitivo mayor y leve ta aumenta exponencialmente cu
aumento di edad y ta duplica cada 6.3 aña cu 3.9 caso den cada 1,000 persona di edad di 90 aña y
mas.

Gasto Global

E manera di calcula e gastonan social-economico di Trastornonan Neurocognitivo den e rapport di
2015 ta igual na esun cu a aplica den e rapport di 2010. Pa cada pais a calcula e gasto pa persona y a
multiplica esaki cu e cantidad di persona cu ta bibando cu e Trastornonan Neurocognitivo den e pais
ey.
Pa cada persona a parti e gastonan den 3 categoria: gasto medico directo, gasto di cuido social (paga
pa cuido profesional na cas y/of instituto) y gasto pa cuido informal (no paga). Aki e gasto global di
Trastornonan Neurocognitivo di tipo Alzheimer a subi di 604 mil miyon US$ na 2010 te na 818 mil
miyon US$ na 2015, un aumento di 35.4%. E calculacion di 818 mil miyon US$ ta representa 1.09%
di e GDP Mundial, un aumento di 1.01% di e calculacion haci pa 2010.
Si exclui e gasto informal, e resto (gasto medico directo y gasto di cuido social) ta yega na 0.65% di
e GDP Mundial.
Den tur region na mundo e gasto calcula a subi, mientras den e regionnan Africano y di Asia Oeste
esaki a crece relativamente mas tanto, pa motibo di e prevalencia mas halto den e regionnan aki.
E particion di e gasto total den e 3 categorianan (cuido medico, cuido social, cuido informal) no a
cambia mucho. Esaki a keda na alrededor di 20% pa cuido medico, 40% pa cuido social y 40% pa
cuido informal.
Na e region Africano e parti di cuido informal ta relativamente mas halto cu e otro regionnan
mientras aki e cuido social ta net contrario y relativamente mas abao cu e otro regionnan.